ប្រជាជន និងអ្នកទេសចរនៅទីក្រុង បដូ(Bordeaux) បានស្វែងរកទីជ្រកនៅក្រោមម្លប់ និងនៅទីប្រភពទឹក Miroir d'Eau ដ៏ល្បីល្បាញរបស់ទីក្រុងដើម្បីទប់ទល់នឹងកម្ដៅ ខណៈនៅភាគនិរតីរបស់ប្រទេសបារាំង បានមើលឃើញសីតុណ្ហភាពខ្ពស់បំផុតនៅក្នុងប្រទេសបារាំង កាលពីថ្ងៃព្រហស្បតិ៍ ទី២៨ ខែឧសភា ក្នុងរលកកម្ដៅដែលកំពុងនៅបន្តនៅប្រទេសនេះ។

សីតុណ្ហភាពត្រូវបានកំណត់ថាកើនឡើងដល់៣៧អង្សាសេ នៅក្នុងទីក្រុង Bordeaux កាលពីថ្ងៃព្រហស្បតិ៍ ដែលលើសពីកម្រិតមធ្យមតាមរដូវកាល ក្នុងខែឧសភា។ អ្នកចូលនិវត្តន៍ម្នាក់ បាននិយាយថា កាលពីមុន មានរដូវក្តៅ រដូវផ្ការីក រដូវស្លឹកឈើជ្រុះ និងរដូវរងា។ បច្ចុប្បន្ន លែងមានទៀតហើយ ១៥ថ្ងៃកន្លងទៅនេះ យើងពាក់អាវធំ ហើយពេលនេះយើងត្រូវស្លៀកពាក់ឈុតហែលទឹក។

អាកាសធាតុក្ដៅខ្លាំង បានមើលឃើញសីតុណ្ហភាពកើនឡើងលើសពី៣០អង្សាសេ នៅទូទាំងប្រទេសមុនរដូវក្តៅ។ ប្រទេសបារាំងកាលពីថ្ងៃអង្គារ ទី២៦ ខែឧសភា ត្រូវបានមើលឃើញថា ជាថ្ងៃក្តៅបំផុតរបស់ប្រទេសនៅក្នុងខែឧសភាដែលមិនធ្លាប់មានពីមុនមក នេះបើយោងតាមការិយាល័យសេវាអាកាសធាតុជាតិ Meteo France។

លោក Patrick Caradeuc ជាអ្នកចូលនិវត្តន៍ បាននិយាយថា អ្នកស្រុកព្យាយាមធ្វើឱ្យខ្លួនឯងត្រជាក់តាមដែលអាចធ្វើទៅបាន ដោយផឹកទឹកឱ្យបានច្រើន។ លោកនិយាយថា «មិនថានៅពេលយប់ ឬពេលព្រឹកទេ គ្មានពេលណាដែលយើងអាចដកដង្ហើមបានស្រួលឡើយ ព្រោះវាក្តៅខ្លាំងគ្រប់ពេល»។