កងទ័ពអ៊ីស្រាអែល នៅ​ថ្ងៃសុក្រ (ទី២៩ ខែឧសភា ឆ្នាំ២០២៦) នេះ បាន​ឲ្យ​ដឹងថា ខ្លួនបានសម្លាប់មេបញ្ជាការជាន់ខ្ពស់មួយ​រូប​របស់​ក្រុម​ហាម៉ាស នៅក្នុងការវាយប្រហារមួយ​ដែលបានធ្វើឡើងនៅតំបន់​ហ្កាហ្សា កាលពីដើមសប្តាហ៍នេះ។

កងទ័ពបានឲ្យដឹង​នៅក្នុងសេចក្តីថ្លែងការណ៍មួយថា លោក Imad Hassan Hussein Aslim គឺជាមេបញ្ជាការរង​នៃ​កងពលតូចក្រុងហ្កាហ្សា (Gaza City Brigade)។

កងទ័ពបានបន្ថែមថា លោកក៏មាន​តួនាទីផងដែរ​ជា​មេបញ្ជាការកងវរសេនាតូច​ Zeitoun នៃកងពលតូច Qassam ដែលជាអង្គភាព​យោធារបស់ក្រុម​ហាម៉ាស។ យោធាបានចោទប្រកាន់ថា លោក Aslim បានចូលរួមក្នុងការវាយប្រហារកាល​ពី​ថ្ងៃទី៧ ខែតុលា ឆ្នាំ២០២៣។

ដោយមិនបាន​បញ្ចេញឈ្មោះឲ្យ​ដឹង​ កង​ទ័ព​បាន​បន្ថែម​ថា ការវាយប្រហារដែលបានសម្លាប់លោក Aslim នេះ ក៏បានកំណត់គោលដៅលើ​មេបញ្ជាការរបស់​ក្រុម​ហាម៉ាសម្នាក់ទៀតផងដែរ។ មិនមានការអត្ថាធិប្បាយភ្លាមៗឡើយ​ ពីក្រុម​ហាម៉ាស ឬកងពលតូច Qassam ជុំវិញ​ការអះអាងរបស់អ៊ីស្រាអែលនេះ​។

ការអះអាងចុងក្រោយបំផុតរបស់អ៊ីស្រាអែលនេះ កើតឡើងស្រប​ពេលមានការរំលោភបន្តបន្ទាប់ លើ​បទឈប់បាញ់ ដែលបានចូលជាធរមានកាលពីខែតុលាឆ្នាំមុន​។ យោងតាមក្រសួងសុខាភិបាលតំបន់​ហ្កាហ្សា បាន​ឲ្យ​ដឹង​ថា ជនជាតិប៉ាឡេស្ទីនចំនួន ៩២២នាក់ ត្រូវបានសម្លាប់ និង ២.៧៨៦នាក់រងរបួស ដោយសារការរំលោភលើបទឈប់បាញ់ ចាប់តាំងពីពេលនោះមក៕