រតនគិរី៖ ស្ថិតក្នុងបរិបទជំងឺកូវីដ-១៩ ទីស្នាក់ការត្រួតពិនិត្យច្រកព្រំដែនអន្តរជាតិអូយ៉ាដាវ ស្ថិតនៅខេត្តរតនគិរី បន្តពង្រឹងវិធានការទប់ស្កាត់ជំងឺកូវីដ បើទោះបីស្ថានមិនសូវមមាញឹកក្តី។

នៅថ្ងៃទី២១ ខែមេសានេះ លោក សាយ ចំរើន ប្រធានទីស្នាក់ការត្រួតពិនិត្យច្រកទ្វារព្រំដែនអន្តរ ជាតិ អូយ៉ាដាវ បានឱ្យដឹងថា បច្ចុប្បន្ន ស្ថានភាពនៅច្រកព្រំដែននេះ ​មិនសូវមមាញឹកនោះទេ គឺមានតែការនាំចេញផលិតផលកសិកម្មតាមរដូវ ​ពីកម្ពុជាទៅប្រទសវៀតណាម ​និងវៀតណាម នាំទំនិញតិចតួចមកកម្ពុជា។

លោកបានបន្តថា បើទោះបីស្ថានភាពនៅច្រកនេះ មិនសូវមមាញឹក តែវិធានការទប់ស្កាត់ជំងឺកូវីដ-១៩ ពីប្រទេសវៀតណាម នៅតែបន្តដោយគោរពតាមការណែនាំរបស់រាជរដ្ឋាភិបាល។

កន្លងទៅ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា ​បានណែនាំដល់អាជ្ញាធរខេត្តជាប់ព្រំ ដែនជាមួយវៀតណាម ​ឱ្យមានការបង្កើនវិធានការទប់ស្កាត់ការឆ្លងជំងឺកូវីដ-១៩ថ្មី។

ប្រទេសកម្ពុជា មានខេត្តចំនួន៩ ដែលជាប់ព្រំប្រទល់នឹងប្រទេសវៀតណាម ដូចជា ខេត្តកណ្តាល កំពត តាកែវ ស្វាយរៀង ព្រៃវែង ត្បូងឃ្មុំ ក្រចេះ រតនគិរី និងមណ្ឌលគិរី៕អត្ថបទ៖ទូច សោភ័ណ