ភ្នំពេញ៖ នៅថ្ងៃទី២១ ខែមេសានេះ កាកបាទក្រហមកម្ពុជា នៅអគារទីស្នាក់ការកណ្តាល បានទទួលថវិកាសម្រាប់ទិវា៨ឧសភា ពីសប្បុរជនចំនួន៤ក្រុមផ្សេងៗគ្នា ដែលបានចូលរួមឧបត្ថម្ភតាមសទ្ធាជ្រះថ្លារៀងខ្លួន ជូនដល់កាកបាទក្រហមកម្ពុជា សម្រាប់ទុកជួយសង្គ្រោះដល់ប្រជាពលរដ្ឋ ដែលរងគ្រោះមហន្តរាយផ្សេងៗ។

ក្នុងឱកាសខួបទី១៥៩ ទិវាពិភពលោកកាកបាទក្រហម និងអឌ្ឍចន្ទក្រហម ៨ឧសភា ឆ្នាំ២០២២ នៅថ្ងៃទី ២១ខែ មេសានេះ មានសប្បុជនចំនួន៤ក្រុមផ្សេងៗគ្នា បានចូលរួមបរិច្ឆាគថវិកា ជូនដល់​កាក​បាទក្រហមកម្ពុជា សម្រាប់បន្តសកម្មភាពមនុស្សធម៌ ក្នុងនោះរួមមាន៖ ក្រុមទី១.លោក លឹម ហូលីវីន តំណាងឧកញ៉ា លឹម រស់ និងលោកជំទាវ សិទ្ធី ម៉ូនីកា ឧបត្ថមថវិកាចំនួន៥ម៉ឺនដុល្លារ​អាមេរិក, ក្រុមទី២.ឧកញ៉ា ថោង សារ៉ាត់ និងលោកជំទាវ ទាវ ធីតា ឧបត្ថម្ភថវិកាចំនួន២ម៉ឺនដុល្លារ​អាមេរិក,ទី៣.លោកជំទាវ ទ្រី ដាណា ឧបត្ថម្ភថវិកាចំនួន១០០លានរៀល, និងទី៤ គ្រឹះស្ថានមីក្រូហិរញ្ញាវត្ថុអម្រឹត ម.ក ឧបត្ថម្ភថវិកាចំនួន៤០លានរៀល។

ក្នុងឱកាសនោះលោកជំទាវកិត្តិបណ្ឌិត អ៊ុក ម៉ាលី អគ្គហេរញ្ញិក កាកបាទក្រហមកម្ពុជា តំណាង​ដ៏ខ្ពង់ខ្ពស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ប្រធានកាកបាទក្រហមកម្ពុជា បានឱ្យដឹងថា ដូចជារៀងរាល់ឆ្នាំថវិកា ​ដែល​កៀងគរ​បានពីសប្បុរសជន​នានា​ ក្នុងទិវា៨ឧសភានេះ គឺកាកបាទ​ក្រហម​កម្ពុជា បានយកទៅប្រើប្រាស់នូវប្រយោជន៍ជាច្រើន​ ដូចជាយកទៅជួយដល់ ជនចាស់​ជរាគ្មាន​ទីពឹង ស្រ្តីមេម៉ាយមានកូនច្រើន​ ស្រ្តីមេម៉ាយមានផ្ទុក​មេរោគអេដស៍ តាមអង្គការ​មជ្ឈមណ្ឌល​កុមារកំព្រាផ្សេងៗ​ អតីត​យុទ្ធជន​ចូលនិវត្តន៍ ធ្វើផ្ទះជូនអតីតយោធិនដែល​មាន​ពិការ​ភាព​ធ្វើអណ្តូងទឹក​កសាងអណ្តូងទឹកស្អាតនៅតាមទីជនបទ​ និងជួយទៅ​ដល់​ប្រជាពល​រដ្ឋណា​ដែលរងគ្រោះ ​ដោយគ្រោះមហន្តរាយដោយធម្មជាតិផ្សេងៗ​ទៀតជាដើម។

ជាមួយគ្នានេះដែរសប្បុរសជនទាំង៤ក្រុមខាងលើ ​បានថ្លែងអំណរគុណយ៉ាងជ្រាវជ្រៅដល់ កាកបាទ​ក្រហមកម្ពុជា ​ដែល​មានហ្លូងម៉ែព្រះជាព្រះប្រធានកិត្តិយស​ និង​សម្តេចកិត្តិព្រឹត្តិបណ្ឌិត ប៊ុន រ៉ានី ហ៊ុនសែន ជាប្រធាន បានផ្តល់ឱកាសឱ្យពួកគាត់ បានចូលរួមចំណែកចែករំលែកជាថវិកា​ទាំងនេះ ​ជាមួយកាកបាទក្រហមកម្ពុជា​ ដើម្បីទុកបន្តធ្វើសកម្មភាពមនុស្សធម៌ដ៏ធំមួយនេះ ដែល​ជា​ការចែករំលែកទៅដល់ប្រជារដ្ឋ ​ដែលមានជីវភាពក្សត់ខ្សោយ និងជួប​ទុក្ខលំបាក៕