ប្រធានទីភ្នាក់ងារថាមពលបរមាណូអន្តរជាតិ (IAEA) កាលពីថ្ងៃអាទិត្យ បានសង្កត់ធ្ងន់ថា ការវាយប្រហារលើរោងចក្រនុយក្លេអ៊ែរ គឺមិនអាចទទួលយកបានទេ ហើយត្រូវតែបញ្ឈប់ដើម្បីជៀសវាងហានិភ័យពិតប្រាកដនៃគ្រោះថ្នាក់នុយក្លេអ៊ែរ។

នៅក្នុងការបង្ហោះមួយនៅលើវេទិកាប្រព័ន្ធផ្សព្វផ្សាយសង្គម X អគ្គនាយក IAEA លោក Rafael Grossi ក៏បានពិពណ៌នាអំពីការវាយប្រហារកាលពីថ្ងៃសៅរ៍ថា ជា «ឧប្បត្តិហេតុដ៏ធ្ងន់ធ្ងរ» ដែលគំរាមកំហែងដល់គោលការណ៍សុវត្ថិភាពនុយក្លេអ៊ែរសំខាន់ៗ។

ការបង្ហោះនោះ បាននិយាយថា ក្រុម IAEA បានត្រួតពិនិត្យរោងចក្រថាមពលនុយក្លេអ៊ែរ Zaporizhzhia បន្ទាប់ពីវាត្រូវបានគេរាយការណ៍ថា ត្រូវបានវាយប្រហារដោយយានដ្រូនកាលពីថ្ងៃសៅរ៍។ ក្រុមការងារបានសង្កេតឃើញការខូចខាតដល់ទ្វារដែកច្រកចូលនៅខាងក្រៅអគារទួរប៊ីន ក៏ដូចជាកម្ទេចកម្ទី និងបំណែកសរសៃអុបទិកដែលឆេះយ៉ាងសន្ធោសន្ធៅ។

ដោយផ្អែកលើការសង្កេតរបស់ខ្លួន ក្រុមនេះបានសន្និដ្ឋានថា ការខូចខាតនេះ គឺស្របនឹងផលប៉ះពាល់នៃការវាយប្រហារដោយយានដ្រូន។

IAEA បាននិយាយថា ខណៈពេលដែលការត្រួតពិនិត្យតាមដាននៅខាងក្នុងអគារទួរប៊ីន ត្រូវបានរំខានដោយសកម្មភាពយានដ្រូន និងការបាញ់ប្រហារនៅក្បែរនោះ អ្នកជំនាញរបស់ខ្លួន បានបញ្ជាក់ថា កម្រិតវិទ្យុសកម្មនៅទីតាំងនោះ នៅតែធម្មតា។ ការវាស់វែងមិនបានបង្ហាញពីការគំរាមកំហែងដោយវិទ្យុសកម្ម ភ្លាមៗនោះទេ៕