នាព្រឹកថ្ងៃចន្ទ (ទី១ ខែមិថុនា ឆ្នាំ២០២៦) នេះ កងកម្លាំងប្រដាប់អាវុធគូវ៉ែត បាន​ប្រាប់​ឲ្យ​ដឹង​ថា ប្រព័ន្ធការពារដែនអាកាសរបស់ប្រទេស កំពុងស្ទាក់ចាប់ការវាយប្រហារដោយមីស៊ីល និងយាន​ដ្រូន​របស់សត្រូវ បន្ទាប់ពីសំឡេងស៊ីរ៉ែនព្រមាន​ពី​ការ​វាយប្រហារពីលើ​អាកាស បានបន្លឺឡើង ហើយការជូនដំណឹងគ្រាអាសន្ន​ត្រូវបានចេញទូទាំងប្រទេស។

អគ្គសេនាធិការកងទ័ពគូ​វ៉ែត បានឲ្យ​ដឹង​នៅក្នុងសេចក្តីថ្លែងការណ៍មួយថា សំឡេងផ្ទុះណាមួយដែលឮនៅទូទាំងប្រទេស គឺបណ្ដាល​មក​ពី​​ប្រព័ន្ធការពារដែនអាកាសកំពុង​ទប់​ទល់​ការគំរាមកំហែងដែល​ចូលមកដល់​​។ ប្រជាពលរដ្ឋត្រូវ​បាន​ជំរុញ​ឲ្យ​គោរពតាមការណែនាំសន្តិសុខ និងសុវត្ថិភាពចេញដោយអាជ្ញាធរ​ពាក់ព័ន្ធ។

មុននេះ ការជូនដំណឹងគ្រា​អាសន្នដែលបានផ្ញើទៅកាន់ទូរស័ព្ទដៃ បានព្រមានអំពី «គ្រោះថ្នាក់ជិតកើត​មាន​» ហើយបានណែនាំសាធារណជនឲ្យ​ស្នាក់នៅក្នុងទីតាំងសុវត្ថិភាព និងនៅឲ្យ​ឆ្ងាយពីបង្អួច និងតំបន់ដែលប៉ះពាល់​។ ការជូនដំណឹងនេះត្រូវបានចេញដោយស្ថាប័ន​ការពារជនស៊ីវិលគូវ៉ែត ក្រោមក្រសួងមហាផ្ទៃ។

សេចក្ដី​រាយការណ៍​ ក្នុងស្រុក បានឲ្យដឹង​ថា សំឡេងនៃសកម្មភាពការពារដែនអាកាស អាចត្រូវបានឮ នៅជិត​តំបន់ Jahra ភាគខាងលិចនៃទីក្រុងរបស់​ប្រទេសគូវ៉ែត។ អាជ្ញាធរមិនទាន់បានចេញផ្សាយព័ត៌មានលម្អិតភ្លាមៗនៅឡើយ​ទេ អំពីប្រភពដើមនៃការវាយប្រហារដោយមីស៊ីល និងយាន​ដ្រូន​ដែលត្រូវ​បានរាយការណ៍នេះ​ ហើយក៏មិនមានរបាយការណ៍ភ្លាមៗនោះដែរ អំពីអ្នកស្លាប់ និងរបួស ឬការខូចខាត៕