​ឥណ្ឌូនេស៊ី៖ រដ្ឋមន្ត្រី​ក្រសួង​ហិរញ្ញវត្ថុ​ឥណ្ឌូនេស៊ី​លោកស្រី Sri Mulyani Indrawati បាន​និយាយ​ថា សង្គ្រាម​រុស្ស៊ី​លើ​អ៊ុយ​ក្រែ​ន​ជា​ប្រធានបទ​ត្រូវ​បាន​ផ្តោត​លើនៅ​ក្នុង​កិច្ចប្រជុំ​ក្រុម​រដ្ឋមន្ត្រី​ហិរញ្ញវត្ថុ​ទាំង ២០ប្រទេស​កាលពី​ថ្ងៃ​ពុធ ដោយ​បាន​ចាត់​ទុក​ការពិភាក្សា​រវាង​ប្រទេស​សេដ្ឋកិច្ច​ធំ​ៗ​របស់​ពិភពលោក​ថា ត្រូវ​បាន​ធ្វើឡើង​ក្រោម​កាលៈទេសៈ​ដ៏​លំបាក​។​

​រដ្ឋមន្ត្រី​ក្រសួង​រតនា​គារ​សហរដ្ឋអាមេរិក​លោកស្រី Janet Yellen និង​រដ្ឋមន្ត្រី​ហិរញ្ញវត្ថុ​អ៊ុយ​ក្រែ​ន​លោក Serhiy Marchenko បាន​ដើរ​ចេញពី​កិច្ចប្រជុំ​ ខណៈ​តំណាង​របស់​រុស្ស៊ី​បាន​ចាប់ផ្តើម​ថ្លែង​។ យោង​តាម​មន្ត្រី​នៅ​ក្នុង​កិច្ច​ប្រជុំ​បាន​និយាយ​ថា ការ​ដើរចេញ​ត្រូវ​បាន​ចូលរួម​ដោយ​រដ្ឋមន្ត្រី​ហិរញ្ញវត្ថុ​មួយ​ចំនួន និង​ទេសាភិបាល​ធនាគារ​កណ្តាល​ក៏បាន​ចាក​ចេញពី​បន្ទប់​ផង​ដែរ។​

មន្ត្រី​និយាយ​ថា រដ្ឋមន្ត្រី និង​ទេសាភិបាល​ធនាគារ​កណ្តាល​មួយ​ចំនួន ​ដែល​បាន​ចូលរួម​កិច្ចប្រជុំ​តាមអ៊ីនធឺណិត​បាន​បិទ​កាមេរ៉ា​របស់​ពួកគេ នៅ​ពេល​ដែល​តំណាង​របស់​ប្រធានាធិបតី​រុស្ស៊ី​លោក Vladimir Putin ឡើង​ថ្លែង​។​ លោក​និយាយ​ថា សមាជិក​ជាច្រើន​បាន​ថ្កោលទោស​សង្គ្រាម ការប្រព្រឹត្ត​មិន​សម​ហេតុផល និង​ជា​ការ​រំលោភ​លើ​ច្បាប់​អន្តរជាតិ​។​ ប្រធានាធិបតី​សហរដ្ឋអាមេរិក​លោក Joe Biden បាន​និយាយ​ថា រុស្ស៊ី​មិន​គួរ​នៅតែ​ជា​សមាជិក G20 នោះ​ទេ​៕

អត្ថបទ៖ ប៊ុនថន