​ស្នូកឃ័រ៖ ​ជើងឯក​ស្នូកឃ័រ​ពិភពលោក ៤សម័យ John Higgins បាន​បន្តដំណើរ​ឡើង​ជុំ​ទី២ ហើយ​ក្រោយ​យកឈ្នះ​កីឡាករ​ថៃ Thepchaiya Un-Nooh ១០-៧ហ្វ្រេ​ម​។ ​​ចាប់ផ្តើម​ដំណាក់កាល​ដំបូង Thepchaiya Un-Nooh បាន​នាំ​មុខមុន ៥-៤ហ្វ្រេ​ម តែ​បទពិសោធន៍​ក្រាស​ក្រែល​របស់​កីឡាករ​វ័យ ៤៦ឆ្នាំ John Higgins គឺ​ជា​ដើមទុន​ដ៏​សំខាន់​ក្នុងការ​វាយបក​យកឈ្នះ​នៅ​ដំណាក់កាល​ទី២ វិញ​។

​​ជុំ​បន្ត​កីឡាករ​ស្កុ​ត​ឡេ​ន​រូបនេះ​នឹង​ជួប​ជាមួយ​កីឡាករ​ប៊ែ​ល​ហ្ស៊ិ​ក Luca Brecel រឺ​កីឡាករ​ថៃ​មួយ​រូប​ទៀត Noppon Saengkham​។ ​ ចំណែកឯ​អតីត​កីឡា​ករលេខ ១ ពិភពលោក​ចិន Ding Junhui បាន​ធ្លាក់​ចេញពី​ការប្រកួត​ហើយ​ក្រោយ​រង​បរាជ័យ​ក្រោម​ស្នាដៃ​កីឡាករ​អង់គ្លេស Kyren Wilson ១០-៨ហ្វ្រេ​ម​។ ​​Ding Junhui ត្រូវ​បន្ត​រង់ចាំ​ទៀត​ដើម្បី​ក្លាយជា​កីឡាករ​ចិន​ដំបូង​ឈ្នះ​ជើងឯក​ពិភពលោក ហើយក៏​ខកខាន​ឈ្នះ​ជើងឯក Tour រយៈពេល ៣ឆ្នាំ​មកហើយ​បន្ទាប់ពី​ឈ្នះ​ចុងក្រោយ​បំផុត​នៅ​ឆ្នាំ២០១៩ UK Championship​។

​​ចំណែកឯ Kyren Wilson ក៏មាន​រដូវ​កាល​មិនល្អ​ដែរ​ឆ្នាំនេះ ដោយ​លទ្ធផល​ល្អ​បំផុត​បាន​ត្រឹម​ឡើងដល់​វគ្គ​ផ្តាច់ព្រ័ត្រ Gibraltar Open ខែ​មុន​។ ​​រីឯ​ជើងឯក​ពិភពលោក​ឆ្នាំ២០១៩ Judd Trump បាន​នាំមុខ ៦-៣ហ្វ្រេ​ម​ត្រឹម​ដំណាក់កាល​ដំបូង​ទៅលើ​កីឡាករ​អ៊ីរ៉ង់ Hossein Vafaei ដែលជា​កីឡាករ​អ៊ីរ៉ង់​ទី១ ​មានមុខ​នៅ​ការប្រកួត​ជើងឯក​ពិភពលោក​៕

​អត្ថបទ​៖​នាង សុភា​វុ​ធ