​​អ៊ុយ​ក្រែ​ន៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​និយាយ​កាលពី​ថ្ងៃ​ពុធ​ថា លោក​បាន​ត្រៀមខ្លួនជាស្រេច​ដើម្បី​ពិភាក្សា​ជាមួយ​ប្រធានាធិបតី​រុស្ស៊ី​លោក Vladimir Putin។ ថ្លែង​ក្នុង​សន្និសីទ​សារព័ត៌មាន​ជាមួយ​ប្រធាន​ក្រុមប្រឹក្សា​អឺរ៉ុប​លោក Charles Michel លោក Zelenskyy បាន​និយាយ​ថា លោក​តែងតែ​ត្រៀមខ្លួន​ជាស្រេច​ដើម្បី​ចរចា​អំពី​ការបញ្ចប់​សង្គ្រាមជាមួយ​លោក ​Putin ប៉ុន្តែ​មិន​ជឿថា ​រុស្ស៊ី​ចង់​ឲ្យ​មាន​ដំណោះស្រាយ​សន្តិភាព​នៅ​អ៊ុយ​ក្រែ​ន​នោះទេ​។​

​អ្នកនាំពាក្យ​របស់​វិមាន​ក្រឹម​ឡាំងលោក Dmitry Peskov បាន​និយាយថា ប្រទេស​រុស្ស៊ីបានបង្ហាញ​ដល់​អ៊ុយ​ក្រែ​ន​នូវ​សេចក្តីព្រាង​ឯកសារ​ ចំពោះ​ការទាមទារ​របស់ខ្លួន​ជា​ផ្នែក​នៃ​កិច្ចចរចា​សន្តិភាព ហើយ​ពេលនេះ​កំពុង​រង់ចាំ​ការឆ្លើយ​តប​ពី​ទីក្រុង​គី​វ។​ ​លោក Peskov និយាយ​ក្នុង​សន្និសីទ​ជាមួយ​អ្នកសារព័ត៌មាន​តាម​ប្រព័ន្ធ​អ៊ីនធឺណិតកាលពី​ថ្ងៃ​ពុធ​ថា ប្រទេសរុស្ស៊ី​បានអនុម័ត​លើ​សេចក្តីព្រាង​ឯកសារ​ ដែលមាន​ចែង​ច្បាស់លាស់​ទៅកាន់​អ៊ុយ​ក្រែ​ន ហើយ​ពេលនេះយើង​កំពុង​រង់ចាំ​ការឆ្លើយតប​។ ​ទីក្រុង​មូ​ស្គូ​បានទាមទារ​ជា​យូរ​មកហើយ​ក្នុងចំណោម​បញ្ហា​ផ្សេងទៀត ​ដែល​ឲ្យ​អ៊ុយ​ក្រែ​ន​បោះបង់បំណង​ដើម្បី​ចូលរួម​ជាមួយ ​NATO​។

​អ៊ុយ​ក្រែ​ន​បាន​និយាយថា ខ្លួន​នឹង​យល់ព្រម​ចំពោះ​រឿងនេះ​ ជា​ថ្នូរ​ទៅនឹង​ការធានាបាន​សន្តិសុខ​ពី​ប្រទេស​មួយចំនួន​។ ​លោក Zelenskyy និយាយថា ស្ថានភាព​នៅ​ភាគ​ខាងកើត និង​ខាងត្បូង​របស់​ប្រទេស​នៅតែមាន​ភាពលំបាក ខណៈ​ទាហាន​រុស្ស៊ី​បាន​បន្ត​ការវាយប្រហារ​ជាថ្មី​។ លោកបាន​ជំរុញ​ឱ្យ​ប្រទេសលោកខាងលិច​បន្ត​បង្កើន​ការដាក់ទណ្ឌកម្ម​លើ​ទីក្រុង​មូ​ស្គូ និង​អនុវត្ត​ការហាមឃាត់​ទាំងស្រុង​លើ​ការនាំចូល​ប្រេង និង​ផលិតផល​ប្រេង​របស់​រុស្ស៊ី​៕

អត្ថបទ៖ ប៊ុនថន