ប្រធានាធិបតីកូរ៉េខាងត្បូង លោក Lee Jae-myung នៅ​ថ្ងៃអង្គារ បានអំពាវនាវឲ្យ​ដាក់ទណ្ឌកម្មយ៉ាងតឹងរ៉ឹង ចំពោះបុគ្គលមាន​ចេតនាផ្សព្វផ្សាយការអះអាងមិនពិតតាមប្រព័ន្ធអ៊ីនធឺណិត ដែល​ថា រដ្ឋាភិបាលនឹងបង្ខំប្រជាជនលក់ប្រាក់ដុល្លារអាមេរិករបស់ពួកគេ។

តាម​រយៈ​ការបង្ហោះមួយនៅលើវេទិកាបណ្ដាញ​សង្គម X លោក Lee បានឆ្លើយតបទៅនឹងរបាយការណ៍ដែលថា នគរបាល​បានកំណត់អត្តសញ្ញាណជនសង្ស័យចំនួន ១០​រូប​ដែលត្រូវបានចោទប្រកាន់ពីបទផ្សព្វផ្សាយការអះអាងមិនពិត ដែល​ថា អាជ្ញាធរមានគម្រោងចេញបទបញ្ជាបន្ទាន់តម្រូវឲ្យ​ពលរដ្ឋលក់ភាគហ៊ុនប្រាក់ដុល្លាររបស់ពួកគេ ក្នុង​ពេលមានក្ដី​បារម្ភ អំពីសេដ្ឋកិច្ច ដែល​ទាក់ទងនឹងភាពតានតឹង នៅតំបន់​មជ្ឈិមបូព៌ា។

តាម​រយៈ​សំណេរ​របស់​លោក លោក​ Lee បានលើកឡើង​ថា៖ «ទង្វើនៃការផ្សព្វផ្សាយព័ត៌មានមិនពិតដោយចេតនា និងការ​បង្កឲ្យ​មានការភាន់ច្រឡំក្នុងសង្គម និងការខូចខាតសេដ្ឋកិច្ច គួរតែត្រូវបានកំណត់អត្តសញ្ញាណ និងផ្តន្ទាទោសយ៉ាងធ្ងន់ធ្ងរ​»។

យោងតាមរបាយការណ៍ប្រព័ន្ធផ្សព្វផ្សាយក្នុងស្រុក ដែលត្រូវ​បាន​ដកស្រង់ដោយប្រធានាធិបតី បាន​ឲ្យ​ដឹង​ថា អ្នកស៊ើបអង្កេត បានតាមដានគណនីអនឡាញចំនួន ១៤ និងបានកំណត់អត្តសញ្ញាណម្ចាស់គណនី ១០​នាក់ ដែលភ្ជាប់ទៅនឹងការបង្ហោះទាំងនោះ៕