អង្គការសុខភាពពិភពលោក(WHO)បាននិយាយថា មានករណីឆ្លងជំងឺអេបូឡាចំនួន ៣២១ ករណីដែលត្រូវបានបញ្ជាក់នៅក្នុងការផ្ទុះឡើងនៃជំងឺនេះនៅសាធារណរដ្ឋប្រជាធិបតេយ្យកុងហ្គោ និងករណីសង្ស័យឆ្លងចំនួន ១១៦ ករណី ដែលជាការធ្លាក់ចុះយ៉ាងខ្លាំងនៃចំនួនករណីសង្ស័យ ខណៈ មនុស្សរាប់រយនាក់ត្រូវបានដកចេញពីការតាមដានបន្ទាប់ពីការស៊ើបអង្កេត។

ទីភ្នាក់ងារនេះបាននិយាយកាលពីថ្ងៃអង្គារ ២មិថុនា សប្ដាហ៍នេះថា មានអ្នកស្លាប់ចំនួន ៤៨ នាក់ និងមនុស្ស ៦ នាក់បានជាសះស្បើយនៅក្នុងប្រទេសកុងហ្គោ។ក្រុមអាជ្ញាធរកុងហ្គោបានចេញផ្សាយចំនួនករណីឆ្លងថ្មីជាលើកដំបូងកាលពីថ្ងៃចន្ទ។

អ្នកនាំពាក្យរបស់អង្គការសុខភាពពិភពលោក លោក Christian Lindmeier បានប្រាប់ក្រុមអ្នកសារព័ត៌មាននៅទីក្រុងហ្សឺណែវថា នៅប្រទេសអ៊ូហ្គង់ដា មានករណីឆ្លងដែលបានបញ្ជាក់ចំនួន ៩ នាក់ និងការស្លាប់ដែលពាក់ព័ន្ធនឹងជំងឺនេះម្នាក់។ ក្រោយមកកាលពីថ្ងៃអង្គារ ក្រសួងសុខាភិបាលអ៊ូហ្គង់ដាបានបញ្ជាក់ករណីឆ្លងថ្មីចំនួន ៦ ករណីទៀតនៃជំងឺអេបូឡា ដោយឱ្យចំនួនឆ្លងសរុបដែលបានបញ្ជាក់នៅក្នុងប្រទេសនេះកើនឡើងដល់ ១៥ ករណី។ ក្រសួងបាននិយាយក្នុងសេចក្តីថ្លែងការណ៍មួយនៅលើបណ្ដាញសង្គម X របស់ខ្លួនថា ករណីឆ្លងទាំង ៦ ត្រូវបានបញ្ជាក់ក្នុងចំណោមអ្នកដែលបានប៉ះពាល់ជាមួយបុគ្គលដែលបានបញ្ជាក់ថាមានផ្ទុកជំងឺអេបូឡាផ្សេងទៀត។

អង្គការសុខភាពពិភពលោក បាននិយាយកាលពីថ្ងៃសុក្រថា មានករណីសង្ស័យឆ្លងចំនួន ៩០៦ ករណីនៃមេរោគអេបូឡា Bundibugyo នៅក្នុងសាធារណរដ្ឋប្រជាធិបតេយ្យកុងហ្គោ រួមទាំងការស្លាប់ដែលសង្ស័យចំនួន ២២៣ នាក់ដែលកំពុងត្រូវបានស៊ើបអង្កេត។ ក្រោយមក លោក Jean Kaseya អគ្គនាយកនៃមជ្ឈមណ្ឌលគ្រប់គ្រង និងបង្ការជំងឺអាហ្វ្រិក បាននិយាយនៅក្នុងអត្ថបទរបស់សារព័ត៌មាន Financial Times ដែលបានចេញផ្សាយកាលពីថ្ងៃអាទិត្យថា ករណីសង្ស័យឆ្លងជាង ១.១០០ ករណីកំពុងត្រូវបានស៊ើបអង្កេត៕