កាលពីថ្ងៃអង្គារ២មិថុនាសប្ដាហ៍នេះ ប្រទេសចិនបានចោទប្រកាន់ប្រមុខការពារជាតិហ្វីលីពីនថាគ្មានការដឹងគុណចំពោះទំនិញសំខាន់ៗរបស់ចិន និងប្រើប្រាស់បញ្ហាអំពីជីវភាពរស់នៅរបស់ប្រជាជនសម្រាប់នយោបាយ បន្ទាប់ពីមានការលើកឡើងអំពីប្រទេសចិនថាជាការគំរាមកំហែង។

រដ្ឋមន្ត្រីការពារជាតិហ្វីលីពីន លោក Gilberto Teodoro បានប្រាប់សារព័ត៌មានរ៉យទ័រកាលពីថ្ងៃសៅរ៍ ទី៣០ ខែឧសភាថ្មីៗនេះ ថា ប្រទេសចិននៅតែជា «ការគំរាមកំហែងធ្ងន់ធ្ងរ» ដែលគ្មានការបង្ហាញពីសុច្ឆន្ទៈល្អរយៈពេលវែង ទោះបីជាទីក្រុងប៉េកាំងទើបតែផ្តល់ជំនួយជីកសិកម្ម និងប្រេងឥន្ធនៈក្នុងអំឡុងពេលខ្វះខាតទាក់ទងនឹងសង្គ្រាមក៏ដោយ។

ក្រសួងការបរទេសចិនបាននិយាយថា ការលើកឡើងទាំងនោះបានបង្ហាញថា លោក Teodoro «ត្រូវបានជំរុញដោយផលប្រយោជន៍ផ្ទាល់ខ្លួន» ហើយពុំបានយកចិត្តទុកដាក់ចំពោះសុខុមាលភាពរបស់ប្រជាជន ឡើយ។

អ្នកនាំពាក្យក្រសួងការបរទេសចិន លោកស្រី Mao Ning បានប្រាប់ក្រុមអ្នកសារព័ត៌មាននៅក្នុងសន្និសីទសារព័ត៌មានមួយកាលពីថ្ងៃអង្គារថា ប្រសិនបើបុគ្គលបែបនេះត្រូវបានអនុញ្ញាតឱ្យធ្វើសកម្មភាពតាមតែអំពើចិត្ត តើប្រទេសចិននឹងបន្តផ្តល់ជំនួយ និងសម្ភារៈដល់ប្រទេសហ្វីលីពីនដោយរបៀបណា? ។

ថ្លែងទៅកាន់ទីភ្នាក់ងារសារព័ត៌មានរ៉យទ័រកាលពីថ្ងៃសៅរ៍នៅខាងក្រៅវេទិកាកិច្ចសន្ទនា Shangri-La របស់ប្រទេសសិង្ហបុរី ដែលជាវេទិកាការពារជាតិកំពូលរបស់អាស៊ី រដ្ឋមន្ត្រីក្រសួងការពារជាតិលោក Gilberto Teodoro បាននិយាយថា វាជារឿងធម្មតាទេសម្រាប់ប្រទេសដូចជាសហរដ្ឋអាមេរិក និងចិនក្នុងការព្យាយាមបន្ធូរបន្ថយភាពតានតឹង ព្រោះនៅពេលដែលពួកគេមានសមភាពខាងការពារជាតិ នោះមានការគោរព និងសមត្ថភាពក្នុងការកែសម្រួលដោយសារតែកម្រិតដែលប្រទេសទាំងពីរមាន៕