មួយ​ខែបន្ទាប់ពីប្រធានាធិបតីអាមេរិក លោក Donald Trump បានប្រកាសនូវ​ផែនការមួយ​ ហើយ​បន្ទាប់មកបានបោះបង់ចោលវិញ​ ដើម្បី​អមដំណើរនាវាពាណិជ្ជកម្មឆ្លងកាត់ច្រកសមុទ្រ Hormuz យោធាអាមេរិក​កំពុងព្យាយាមមាន​​វិធីដែល​ឲ្យ​សាធារណៈដឹង​តិចជាងមុន ក្នុងការការពារនាវានៅផ្លូវទឹកដ៏សំខាន់នេះ​។

ជំនួសឲ្យ​ការប្រកាសពីបញ្ហាប្រឈមបើកចំហ ប្រឆាំងនឹងអ៊ីរ៉ង់ សហរដ្ឋអាមេរិកកំពុងសម្របសម្រួលដោយស្ងាត់ៗជាមួយក្រុមហ៊ុនដឹកជញ្ជូនដែលមានឆន្ទៈ ក្នុងការទទួល​យក​វិធីសាស្រ្តផ្សេងៗ។

ភស្តុតាងដែលប្រមូលបានពីសេចក្តីថ្លែងការណ៍របស់បញ្ជាការកណ្តាលសហរដ្ឋអាមេរិក ទិន្នន័យដឹកជញ្ជូន និងបុគ្គល​ដែលដឹងអំពីការឆ្លងកាត់នេះ បានបង្ហាញថា នាវាកំពុងបិទឧបករណ៍បញ្ជូនសញ្ញា និងធ្វើ​ដំណើរកៀក​នឹង​ឆ្នេរសមុទ្រអូម៉ង់ នៅភាគខាងត្បូងនៃច្រកសមុទ្រនេះ ដើម្បី​គេច​​ពី​មីនរបស់​អ៊ីរ៉ង់ ដោយយោធាអាមេរិកនឹង​ផ្ដល់​ជំនួយ ប្រសិនបើចាំបាច់។ ភស្តុតាងចុងក្រោយបំផុត បានលេច​ឡើងកាល​ពី​យប់ថ្ងៃអង្គារ (ទី២ ខែមិថុនា ឆ្នាំ២០២៦) ក្នុងពេល​ជម្លោះ​ឡើង​ក្ដៅ​ភ្លាម​ៗ រវាងសហរដ្ឋអាមេរិក និងអ៊ីរ៉ង់។

បញ្ជាការកណ្តាលបានចេញសេចក្តីថ្លែងការណ៍មួយ ដោយបញ្ជាក់​ថា កងកម្លាំងរបស់ខ្លួន បានបាញ់ទម្លាក់យានដ្រូន​វាយប្រហាររបស់អ៊ីរ៉ង់ដែលមានគោលបំណងសំដៅ​ទៅ​ «នាវិកស៊ីវិលដែលកំពុងឆ្លងកាត់ដែនទឹកក្នុងតំបន់ដោយស្របច្បាប់»។ កងកម្លាំងអាមេរិកក៏បានធ្វើ «ការវាយប្រហារការពារខ្លួន» លើស្ថានីយ៍ត្រួតពិនិត្យលើ​ដីរបស់​យោធាអ៊ីរ៉ង់ផងដែរ។

កិច្ចប្រឹងប្រែងនេះ គឺជាការផ្លាស់ប្តូរយុទ្ធសាស្ត្រ ពីគម្រោង​ផែនការ​ពីមុនរបស់លោក Trump ឈ្មោះ Project Freedom ដែលលោកបានដាក់ចេញកាល​ពី​ដើមខែឧសភា។ គំនិតផ្តួចផ្តើមនោះ ដែលបានបង្ហាញជាមួយនឹងការបង្ហោះនៅលើបណ្ដាញ​សង្គម និងបានរៀបរាប់លម្អិត នៅក្នុងសេចក្តីសង្ខេបផ្លូវការរបស់សេតវិមាន បានបង្កឲ្យ​មានការវាយប្រហារពីអ៊ីរ៉ង់ និងប្រឈម​ធ្វើ​ឲ្យ​បទឈប់បាញ់ដ៏ផុយស្រួយ រវាងគូអរិ​ទាំង២ ដួលរលំ​៕