នាយករដ្ឋមន្ត្រីថ្មីរបស់កោះសូឡូម៉ុន បាននិយាយនៅថ្ងៃពុធ (ទី៣ ខែមិថុនា ឆ្នាំ២០២៦) នេះថា ប្រទេសប៉ាស៊ីហ្វិកមួយនេះ នឹងចរចាសន្ធិសញ្ញាយុទ្ធសាស្ត្រគ្រប់ជ្រុង​ជ្រោយ​ជាមួយអូស្ត្រាលី និងពិនិត្យឡើងវិញនូវកិច្ចព្រមព្រៀងសន្តិសុខជាមួយចិន។

លោក Matthew Wale គឺជាឥស្សរជនប្រឆាំងចាស់វស្សាមួយ​រូប​ ដែលធ្លាប់រិះគន់ប្រទេសចិន កាលពីអតីតកាល​។ ហើយ​ដំណើរទស្សនកិច្ចរបស់លោកទៅកាន់ទីក្រុងកង់បេរ៉ា (Canberra) បានកើតឡើងមិន​ដល់​ ៣សប្តាហ៍ផង បន្ទាប់ពីលោកបានក្លាយជាមេដឹកនាំនៃប្រទេសប្រជុំកោះដែលមានចម្ងាយ ១.៦០០គីឡូម៉ែត្រ នៅ​ភាគឦសាននៃប្រទេសអូស្ត្រាលី។

កោះសូឡូម៉ុនត្រូវបានមើលឃើញថា ជាប្រទេសដែលមានទំនាក់ទំនងជិតស្និទ្ធបំផុតជាមួយទីក្រុងប៉េកាំង ក្នុងចំណោមបណ្ដាកោះប៉ាស៊ីហ្វិកដែលមានទីតាំងជា​យុទ្ធសាស្ត្រ។ ប្រទេស​នេះ​បានចុះហត្ថលេខាលើកតិកាសញ្ញាសន្តិសុខជាមួយចិន ក្នុងឆ្នាំ២០២២ ដែលបង្កឲ្យ​មានក្ដី​បារម្ភពីប្រទេសជិតខាង និងសហរដ្ឋអាមេរិក ហើយ​នាំ​ឲ្យ​មាន​ការបង្កើនការទូតរបស់អូស្ត្រាលី នៅក្នុងតំបន់។

នៅក្នុងសន្និសីទសារព័ត៌មានជាមួយសមភាគីអូស្ត្រាលីរបស់លោក គឺលោក Anthony Albanese លោក Wale បានថ្លែងថា៖ «កោះសូឡូម៉ុនគឺជាមិត្តរបស់អូស្ត្រាលី ​តែងតែបែប​នេះ ហើយ​នឹងតែងតែបែប​នេះ​ជានិច្ច​»។ លោកបានបន្ថែម​ថា៖ «យើងទទួលស្គាល់ថា មានបញ្ហាក្នុងរយៈពេលប៉ុន្មានឆ្នាំចុងក្រោយនេះ។ យើងបានស្វែងរកការរៀប​ចំ​ទំនាក់​ទំនង​ឡើងវិញ»។

ក្នុងឆ្នាំ២០២២ លោក Wale បាននិយាយថា កិច្ចព្រមព្រៀងជាមួយប្រទេសចិន គឺប្រឆាំងនឹងផលប្រយោជន៍របស់កោះសូឡូម៉ុន ប៉ុន្តែចាប់តាំងពីលោកបានទៅទស្សនកិច្ចទីក្រុងប៉េកាំង លោក​មិនសូវរិះគន់ចិនទៀត​ឡើយ​​។ លោកបាននិយាយថា កិច្ចព្រមព្រៀងសន្តិសុខ មានប្រការដែល​មិនបង្ហាញព័ត៌មានច្បាស់​លាស់​​ ហើយលោកទើបតែបានឃើញច្បាប់ចម្លង​ទាំង​ស្រុង​ជាលើកដំបូង ក្នុងរយៈពេលប៉ុន្មានថ្ងៃថ្មីៗនេះ បន្ទាប់ពីតវ៉ា​យ៉ាង​ខ្លាំង​ ដើម្បី​​ចូលមើល​ឯក​សារ​នោះ​​៕