មន្ត្រីអ៊ីស្រាអែលមួយរូប​មិនអាចបញ្ចប់សុន្ទរកថារបស់ខ្លួន​បាន​ឡើយ នៅឯ​សន្និសីទអង្គការពលកម្មអន្តរជាតិ (ILO) ក្នុង​ទីក្រុងហ្សឺណែវ ប្រទេសស្វីស កាលពីថ្ងៃអង្គារ (ទី២ ខែមិថុនា ឆ្នាំ២០២៦) បន្ទាប់ពីប្រតិភូបានរំខានសុន្ទរកថារបស់លោក​ម្តងហើយម្តងទៀតជាមួយនឹងការតវ៉ាគាំទ្រប្រជាជនប៉ាឡេស្ទីន។

អ្នកការទូតអ៊ីស្រាអែល លោក Waleed Gadban បានឡើង​ទៅ​វេទិកា អំឡុងសន្និសីទពលកម្មអន្តរជាតិលើកទី១១៤ ទាក់ទងនឹងការបោះឆ្នោត នៅក្នុងមហាសន្និបាត ប៉ុន្តែត្រូវជួបនឹងការតវ៉ាជាបន្តបន្ទាប់ពីអ្នកចូលរួម។ រដ្ឋមន្ត្រីមកពីប្រទេសជាច្រើន ក៏ដូចជាតំណាងសហជីព កម្មករ និងនិយោជក បានគោះតុរបស់ពួកគេ នៅពេលដែលលោក Gadban ព្យាយាមនិយាយ​។

រដ្ឋមន្ត្រីក្រសួងការងារ និងសន្តិសុខសង្គមទួរគី លោក Vedat Isikhan ​សមាជិកនៃគណៈប្រតិភូទួរគី និងតំណាងសហជីពមកពីប្រទេសទួរគី ក៏បានចូលរួមក្នុងការតវ៉ានេះផងដែរ។ អ្នកចូលរួមមួយចំនួន បានបង្ហាញទង់ជាតិប៉ាឡេស្ទីន ប៉ុន្តែត្រូវបានបុគ្គលិកសន្តិសុខព្រមាន និងស្នើសុំ​យក​ចេញ។ មន្ត្រីមួយចំនួន នៅក្នុងសាល ក៏ត្រូវបានគេឃើញពាក់​​ក្រមាដែលមានពាក្យថា «ផ្ដល់​សេរីភាព​ដល់​ប៉ាឡេស្ទីន»។

ទោះបីជាមានការអំពាវនាវម្តងហើយម្តងទៀតពី​ប្រធានសន្និសីទ លោក Juan Castillo ក៏ដោយ ក៏​ការតវ៉ានៅតែបន្តមាន​ ហើយលោក Gadban មិនអាចបញ្ចប់សុន្ទរកថារបស់លោក​បានទេ មុនពេលវេទិកាត្រូវបានផ្តល់ឲ្យ​វាគ្មិនបន្ទាប់៕