​អេឡិច​ត្រូនិក៖ បន្ទាប់ពី​ការប្រកួត​វិល​ជុំ​សន្សំ​ពិន្ទុ​អស់​ពេល​ជាច្រើន​សប្តាហ៍ លី​គ​អាជីព​កីឡា​អេឡិចត្រូនិក MPL-KH នៅ​កម្ពុជា​សម្រាប់​វិញ្ញាសា Mobile Legends: Bang Bang បាន​រកឃើញ​ក្រុម​ខ្លាំង ៤​ក្រុមឡើង​វគ្គ​ពាក់កណ្តាល​ផ្តាច់ព្រ័ត្រ​ហើយ​។​

​សម្រាប់​ការប្រកួត​វិលជុំ​សន្សំ​ពិន្ទុ វគ្គ ៨​ក្រុម​ចុងក្រោយបានបញ្ចប់​ដោយ​ភាពស្វិតស្វាញ និង​រីករាយ​បំផុតបន្ទាប់ពី​ក្រុម​នីមួយៗធ្វើការ​ប្រកួត​ជាមួយគ្នា​ទាំងអស់។ ជា​លទ្ធផល​ក្រោយ​ដំណើរការ​ប្រកួត​ជាច្រើន​សប្ដាហ៍ ក្រុម Impunity KH បានទទួល​ពិន្ទុ​ច្រើនជាងគេដើម្បី​ឈរ​កំពូល​តារាង ហើយ​ក៏មាន​សមាជិក​ក្រុម​ជាច្រើន​បានក្លាយ​ជា​កីឡាករ​ឆ្នើម​ប្រចាំការ​ប្រកួត​នីមួយៗផងដែរ។​ ​ចំពោះ​លទ្ធផល​ការប្រកួត​វគ្គ​ខ្វែង ក្រុម Team MAX ទទួលបាន​ជ័យជម្នះ​ពី​ការប្រកួត​ដ៏​ស្វិតស្វាញ​លើ​ក្រុម Logic Esports ក្នុង​ជ័យជម្នះ ៣-២ ស្របពេល​ក្រុម​ខ្លាំង Impunity KH បាន​យកឈ្នះ​ក្រុម Infamous LG ដោយ​លទ្ធផល ៣-០ ដើម្បី​ដឹក​ដៃ​គ្នា​ឡើង​វគ្គ​ពាក់កណ្ដាល​ផ្ដាច់ព្រ័ត្រ។ រីឯ​ក្រុម Burn X Plax បាន​យកឈ្នះ​ក្រុម DG Quantum ដោយ​លទ្ធផល ៣-១ ខណៈ​ក្រុម See You Soon បាន​យកឈ្នះ​ក្រុម Divinity SaGa ដោយ​លទ្ធផល ៣-០ ដើម្បី​ឡើងទៅ​កាន់​វគ្គ​ពាក់កណ្តាល​ផ្តាច់ព្រ័ត្រ​ដូចគ្នា។​

​សម្រាប់​ការប្រកួត​វគ្គ​ពាក់កណ្តាល​ផ្តាច់ព្រ័ត្រ និង​វគ្គ​ផ្តាច់ព្រ័ត្រនឹង​ប្រព្រឹត្ត​ទៅនា​ថ្ងៃទី​២៣ និង​ថ្ងៃទី​២៤ ខែមេសា​ចុង​សប្ដាហ៍​នេះ ដោយ​អ្នកគាំទ្រអាច​ចូលរួម​ទស្សនា និង​គាំទ្រ​ដល់​ការប្រកួត​វគ្គ​សំខាន់ ​ជាមួយនឹង​សកម្មភាព​សប្បាយរីករាយ​ជាច្រើននៅ​ផ្សារ​ទំនើប​អ៊ី​អន​សែន​សុខ៕

​អត្ថបទ៖ លី ឈុន​ឡា