រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយកាលពីថ្ងៃពុធ៣ មិថុនា ថា «ពុំមានវឌ្ឍនភាពជាក់ស្តែងណាមួយ» ត្រូវបានធ្វើឡើងនៅក្នុងការចរចាដើម្បីបញ្ចប់សង្គ្រាមមជ្ឈិមបូព៌ា ខណៈការវាយប្រហារថ្មីៗរបស់សហរដ្ឋអាមេរិក និងអ៊ីរ៉ង់ បានធ្វើឱ្យបទឈប់បាញ់ដ៏ផុយស្រួយមួយកាន់តែតានតឹង យ៉ាងណាលោកថា ខ្សែទំនាក់ទំនងជាមួយអាមេរិកនៅតែបើកចំហ។

ក្រុមមន្ត្រីកូវ៉ែតបាននិយាយថា អរិភាពដែលបានបន្តរួមមានការវាយប្រហារដោយយានដ្រូនរបស់អ៊ីរ៉ង់ទៅលើស្ថានីយអ្នកដំណើរនៅអាកាសយានដ្ឋានអន្តរជាតិកូវ៉ែត ដែលបានសម្លាប់មនុស្សម្នាក់ និងរបួស៦៣ នាក់។

ផ្ទុយពីការអត្ថាធិប្បាយរបស់អ៊ីរ៉ង់ដែលមិនសូវល្អ ប្រធានាធិបតីអាមេរិក Donald Trump បានកត់សម្គាល់ដោយសុទិដ្ឋិនិយម ដោយប្រាប់ក្រុមអ្នកសារព័ត៌មាននៅសេតវិមានថា កិច្ចចរចាជាមួយអ៊ីរ៉ង់អាចទទួលបានលទ្ធផល «នៅចុងសប្តាហ៍នេះ»។

លោក Trump បាននិយាយអំពីកិច្ចព្រមព្រៀងដែលអាចកើតមានថា «រូបលោកឮថាការចរចាកំពុងដំណើរការទៅយ៉ាងល្អ »។ «វាអាចកើតឡើង នៅចុងសប្តាហ៍នេះ»។

លោក Trump ក៏បាននិយាយផងដែរថា លោកចង់បំបែកកិច្ចចរចាលើជម្លោះនៅលីបង់រវាងអ៊ីស្រាអែល និងក្រុមហេសបូឡា ដែលគាំទ្រដោយអ៊ីរ៉ង់ និងសង្គ្រាមរវាងសហរដ្ឋអាមេរិក និងអ៊ីរ៉ង់ ទោះបីជាទីក្រុងតេអេរ៉ង់ទទូចថាភាគីទាំងពីរនេះមានទំនាក់ទំនងគ្នាក៏ដោយ៕