មេដឹកនាំកូរ៉េខាងជើងលោក គីម ជុងអ៊ុន បានជួបស្វាគមន៍ និងអបអរសាទរក្រុមបាល់ទាត់នារី នៅរដ្ឋធានី Pyongyang បន្ទាប់ពីពួកគេទទួលបានជោគជ័យលើឆាកអន្តរជាតិ នេះបើយោងតាមការចេញផ្សាយរបស់ប្រព័ន្ធផ្សព្វផ្សាយរដ្ឋកាលពីថ្ងៃទី ២ ខែមិថុនា។

តាមរយៈវីដេអូដែលចាក់ផ្សាយដោយទូរទស្សន៍រដ្ឋ (KRT) កីឡាការិនីរបស់ក្លិបបាល់ទាត់នារី Naegohyang និងក្រុមជម្រើសជាតិនារីអាយុក្រោម ១៧ ឆ្នាំរបស់កូរ៉េខាងជើង បានបង្ហាញអារម្មណ៍រំភើបយ៉ាងខ្លាំង ដោយមានទាំងការស្រែកអបអរ និងស្រក់ទឹកភ្នែកនៅពេលបានជួបមេដឹកនាំរបស់ពួកគេ។

បន្ទាប់ពីពិធីស្វាគមន៍ លោក គីម ជុងអ៊ុន និងមន្ត្រីជាន់ខ្ពស់រដ្ឋាភិបាល បានចូលរួមទស្សនាការប្រកួតមិត្តភាពរវាងក្រុមជើងឯកទាំងពីរផងដែរ។

ក្លិបនារី Naegohyang បានបង្កើតប្រវត្តិសាស្ត្រកាលពីខែឧសភា ដោយឈ្នះពានរង្វាន់ AFC Women's Champions League ក្រោយយកឈ្នះក្លិបជប៉ុន Tokyo Verdy Beleza ក្នុងវគ្គផ្តាច់ព្រ័ត្រ។ ជាមួយនឹងជ័យជម្នះនេះ ក្រុមបានកក់កៅអីចូលរួមប្រកួតពាន FIFA Women's Champions Cup ឆ្នាំក្រោយផងដែរ។

គួរបញ្ជាក់ថា ការធ្វើដំណើរទៅកាន់ប្រទេសក្បែរខាងកូរ៉េខាងត្បូងរបស់ Naegohyang កាលពីខែឧសភា គឺជាលើកដំបូងក្នុងរយៈពេល ៨ ឆ្នាំ ដែលអត្តពលិកកូរ៉េខាងជើងបានទៅប្រកួតនៅទឹកដីកូរ៉េខាងត្បូង។

ជាមួយគ្នានេះដែរ ក្រុមបាល់ទាត់នារីជម្រើសជាតិកូរ៉េខាងជើងអាយុក្រោម ១៧ ឆ្នាំ ក៏បានបង្ហាញទម្រង់លេងដ៏អស្ចារ្យ ដោយដណ្តើមបានជើងឯកពាន AFC U17 Women's Asian Cup កាលពីខែឧសភាកន្លងទៅ ដែលបន្ថែមមោទនភាពដល់វិស័យបាល់ទាត់នារីរបស់ប្រទេសមួយនេះ៕ អត្ថបទ៖នាង សុភាវុធ