អ៊ុយក្រែន៖ ឧបនាយករដ្ឋមន្ត្រីអ៊ុយក្រែនលោកស្រី Iryna Vereshchuk បាននិយាយនៅក្នុងសារបង្ហោះតាម Telegram កាលពីល្ងាចថ្ងៃព្រហស្បតិ៍ថា គ្មានពលរដ្ឋណាម្នាក់អាចជម្លៀសចេញពីទីក្រុងរងការឡោមព័ទ្ធ Mariupo បានទេកាលពីថ្ងៃព្រហស្បតិ៍ ដោយសារតែការបាញ់ផ្លោងរបស់កងទ័ពរុស្ស៊ីនៅតែបន្ត ទៅលើច្រករបៀងមនុស្សធម៌ដែលបានព្រមព្រៀង។
លោកស្រីបានសរសេរថា គ្មានដំណឹងរីករាយណាមួយអំពីទីក្រុង Mariupol ទេ។ អ្វីៗគ្រប់យ៉ាងកំពុងបោះជំហានទៅមុខយ៉ាងលំបាក។ ចំណែកភាគីខាងរុស្ស៊ីវិញ អ្វីៗពិតជាលំបាកខ្លាំងណាស់ ពោរពេញដោយភាពស្មុគស្មាញ មានការរីកចម្រើនយឺតយ៉ាវ និងគ្មានភាពស្មោះត្រង់។ យើងសូមអភ័យទោសដល់ពលរដ្ឋទីក្រុង Mariupol ដែលមិនអាចជួយជម្លៀសពួកគេចេញបាននៅថ្ងៃនេះ។ ការបាញ់ផ្លោងរបស់រុស្ស៊ីបានចាប់ផ្ដើមនៅចំណុចនៃការជម្លៀស ជាហេតុធ្វើឲ្យច្រករបៀងមនុស្សធម៌ត្រូវតែបិទ។
ក្នុងការបង្ហោះសារដូចគ្នានេះដែរលោកស្រី Vereshchuk បានទទួលស្គាល់ថា កាលពីថ្ងៃពុធក្បួនរថយន្តក្រុងចំនួន ៤គ្រឿងត្រូវបានអនុញ្ញាតឲ្យដឹកជញ្ជូនជនស៊ីវិល ៧៩នាក់ចេញពីទីក្រុង Mariupol ទៅកាន់ដែនដីគ្រប់គ្រងដោយរដ្ឋធានី Kyiv ក្នុងតំបន់ Zaporizhzhia ភាគខាងកើតរបស់អ៊ុយក្រែន ជាការរីកចម្រើនមួយដែលលោកស្រីនិយាយថា បានផ្ដល់ក្ដីសង្ឃឹមឲ្យលោកស្រី៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
