ប្រធានាធិបតីអាមេរិក លោក Donald Trump បាននិយាយកាលពីថ្ងៃពុធ (ទី៣ ខែមិថុនា ឆ្នាំ២០២៦) ថា ក្រោមកិច្ចព្រមព្រៀងមួយដែលកំពុងពិភាក្សាជាមួយអ៊ីរ៉ង់ «សហរដ្ឋអាមេរិក​នឹងទទួលបាន» ស្តុកសារធាតុ​អ៊ុយរ៉ានី​ញ៉ូមចម្រាញហើយ​កម្រិត​ខ្ពស់​របស់ទីក្រុងតេអេរ៉ង់ ដែលជាចំណុចជាប់គាំងដ៏សំខាន់មួយ នៅក្នុងដំណើរ​ការចរចា ប៉ុន្តែបានបន្ថែមថា លោកចង់ផ្ដាច់សង្គ្រាមនៅ​លីបង់ចេញពីការចរចាកិច្ចព្រមព្រៀងនុយក្លេអ៊ែរនេះ​។

លោក Trump បានបញ្ជាក់​ថា ការចរចាជាមួយអ៊ីរ៉ង់អាចទទួលបានលទ្ធផល នៅចុងសប្តាហ៍ខាងមុខ ហើយកំពុងដំណើរការទៅ​ «ល្អណាស់»។ លោកបាននិយាយ​ថា៖ «ខ្ញុំឮថា ការចរចានេះ​កំពុងដំណើរការទៅយ៉ាងល្អ»។ ដោយលើកឡើង​បន្ថែម អំពីកិច្ចព្រមព្រៀងដែលអាចកើតមាននេះ​ លោក Trump បានប្រាប់អ្នកសារព័ត៌មានថា៖ «វាអាចកើតឡើង នៅចុងសប្តាហ៍»។

ពាក់ព័ន្ធ​នឹងសង្គ្រាម នៅប្រទេស​លីបង់ លោក Trump បាននិយាយថា លោកចង់ផ្ដាច់​ការចរចាពីជម្លោះ​នោះចេញ​ពី​​សង្គ្រាម រវាងសហរដ្ឋអាមេរិក និងអ៊ីរ៉ង់ ទោះបីជាទីក្រុងតេអេរ៉ង់ទទូចថា ជម្លោះទាំងនេះត្រូវបានផ្សារ​ភ្ជាប់គ្នាក៏ដោយ។ ប្រធានាធិបតីអាមេរិករូប​នេះ​បាននិយាយ​ថា៖ «ខ្ញុំចង់ផ្ដាច់​វាចេញ​។ ខ្ញុំចង់ឲ្យ​រឿងនេះ​ដាច់ដោយឡែកពីគ្នា​​ ព្រោះវាមិន​ពាក់​ព័ន្ធ​គ្នាទេ​»។

ជាមួយ​គ្នានេះ លោកបានឲ្យ​ដឹង​ទៀត​ថា សហរដ្ឋអាមេរិក «ពិតជាបានជជែក​ជាមួយក្រុម​ហេសបូឡាជាលើកដំបូងមែន»។ ប៉ុន្តែនៅពេលត្រូវបាន​សួរ អំពីការ​លើក​ឡើង​ទាំងនេះ កាល​ពី​ថ្ងៃអង្គារ រដ្ឋមន្ត្រីការបរទេសលោក Marco Rubio បានបញ្ជាក់​ថា លោក Trump កំពុងសំដៅទៅលើអ្នកសម្របសម្រួល នៅក្នុងរដ្ឋាភិបាលលីបង់ដែលកំពុងបញ្ជូនសារ រវាងក្រុមដែលគាំទ្រដោយអ៊ីរ៉ង់ និងទីក្រុងវ៉ាស៊ីនតោន៕