ប្រធានាធិបតីអាមេរិកអាមេរិក​ លោក Donald Trump បានប្រាប់​ឲ្យ​ដឹង​កាលពីថ្ងៃពុធ (ទី៣ ខែមិថុនា ឆ្នាំ២០២៦) ថា លោកនឹងចូលរួមកិច្ចប្រជុំកំពូលនៃ​មេដឹកនាំរបស់​ប្រទេសមាន​ឧស្សាហកម្ម​លូត​លាស់​ទាំង៧ (G7) នៅបារាំង ខណៈរដ្ឋមន្ត្រីការបរទេស ​លោក Marco Rubio បានបញ្ជាក់នៅ​ថ្ងៃពុធនោះ​ថា មេដឹកនាំ​អាមេរិករូប​នេះ នឹងមាន​វត្តមាន​ក្នុង​កិច​ប្រជុំ​នៃប្រមុខរដ្ឋរបស់​អង្គការ​ណាតូ (NATO) នៅទីក្រុងអង់ការ៉ារបស់ទួរគី​ នៅខែកក្កដា។

លោក Trump បានសរសេរនៅលើបណ្ដាញ​សង្គម​ Truth Social ថា៖ «ខ្ញុំនឹងទៅចូល​រួម​កិច្ច​ប្រជុំ​ G7 នៅប្រទេសបារាំង ភ្លាមៗបន្ទាប់ពីអ្វីដែលនឹងក្លាយជាយប់ដ៏រីករាយបំផុតមួយ ក្នុងប្រវត្តិសាស្ត្រអាមេរិក គឺការប្រកួតយុទ្ធ​គុន​ចម្រុះ​ជើងឯកពិភពលោក UFC លើវាលស្មៅនៅ​ទិស​ខាងត្បូងសេតវិមាន»។

កិច្ចប្រជុំកំពូលនេះ នឹងប្រព្រឹត្តទៅនៅតំបន់​​ Evian-les-Bains នៅ​ភាគអាគ្នេយ៍នស​ប្រទេសបារាំង នា​ថ្ងៃទី ១៥-១៧ ខែមិថុនា។ G7 មាន​ប្រទេសសេដ្ឋកិច្ចជឿនលឿនបំផុតចំនួន​ ៧ របស់ពិភពលោក គឺកាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស និងសហរដ្ឋអាមេរិក ដោយសហភាពអឺរ៉ុបក៏ជាសមាជិកផងដែរ។

ពាក់​ព័ន្ធ​នឹង​ការជួប​ជុំ​របស់​​អង្គការណាតូវិញ​ ​លោក Rubio បានបញ្ជាក់​ថា កិច្ចប្រជុំកំពូលនេះ នឹងក្លាយជា «កិច្ចប្រជុំដ៏សំខាន់បំផុត» នៅក្នុងប្រវត្តិសាស្ត្ររបស់សម្ព័ន្ធមិត្ត ពីព្រោះ «មានរឿងមួយចំនួន ដែលត្រូវដោះស្រាយ និងកែលម្អ​»។ លោក Rubio បានប្រាប់គណៈកម្មាធិការកិច្ចការបរទេសសភាថា «សហរដ្ឋអាមេរិកនៅតែស្ថិតក្នុងសម្ព័ន្ធភាពណាតូ ហើយយើងនឹងមាន​វត្តមាន​នៅ​ទី​នោះ​»។

ទោះបី​ជា​ទីក្រុងវ៉ាស៊ីនតោននៅតែជាសមាជិកក៏ដោយ​ ក៏​លោកបានសង្កត់ធ្ងន់​ថា អង្គការនេះត្រូវការ «ការផ្លាស់ប្តូរសំខាន់ៗ» ដែលនឹងត្រូវពិភាក្សានៅក្នុងកិច្ចប្រជុំនៅថ្ងៃទី ៧-៨ ខែកក្កដា ក្នុង​រដ្ឋធានីរបស់​ទួរគី​។

ហើយ​លោក Rubio បានបញ្ជាក់ជាថ្មីនូវវោហាសាស្ត្រយូរអង្វែងរបស់​រដ្ឋបាល ដែល​ថា ប្រទេសនៅអឺរ៉ុបខាងលិច បានជៀសវាងមិន​ចំណាយលើវិស័យការពារជាតិអស់រយៈពេលជាច្រើនទសវត្សរ៍មកហើយ ដោយពឹងផ្អែកលើខែលសន្តិសុខរបស់សហរដ្ឋអាមេរិក ដើម្បីផ្តល់មូលនិធិដល់បណ្តាញសុវត្ថិភាពសង្គម «ដ៏ធំទូលាយ និងរឹងមាំ»៕