សមាជិកក្រុមជួយសង្គ្រោះ បានប្រាប់ប្រព័ន្ធ​ផ្សព្វផ្សាយ​ ABC News ថា ប្រតិបត្តិ​ការស្វែងរកអ្នករុក​រករ៉ែមាស ២នាក់ផ្សេង​ទៀត​ ដែលគេជឿថា ជាប់ក្នុងរូងភ្នំលិចទឹក នៅប្រទេសឡាវ ត្រូវបានគេរំពឹងថា នឹងចាប់​ផ្ដើម​ឡើងវិញ នៅថ្ងៃព្រហស្បតិ៍ (ទី៤ ខែមិថុនា ឆ្នាំ២០២៦) នេះ បន្ទាប់ពីភ្លៀងរដូវ​មូសុង បានរំខាន​ដល់​កិច្ចប្រឹងប្រែងជួយសង្គ្រោះនេះ។

ក្រុមជួយសង្គ្រោះ បាន​ឲ្យ​ដឹង​ថា អ្នករុករករ៉ែ ៥នាក់ផ្សេងទៀត ត្រូវបានជួយសង្គ្រោះកាលពីសប្តាហ៍មុន ដោយ​ម្នាក់ក្នុងចំណោមពួកគេ ត្រូវបានបង្រៀនពី​វិធី​មុជទឹកដោយមាន​បំពង់​អុកស៊ីហ្សែន​ ដើម្បីធ្វើដំណើរទៅកាន់មាត់រូងភ្នំ។ ហើយ​លោក Robin Cuesta ដែលជាអ្នកមុជទឹកម្នាក់របស់​ក្រុម​ប្រតិបត្តិការជួយសង្គ្រោះ បានប្រាប់ប្រព័ន្ធ​ផ្សព្វផ្សាយ ABC News ថា នៅថ្ងៃព្រហស្បតិ៍នេះ ក្រុមស្វែងរកមានគម្រោងចុះតាមផ្លូវ​ដែលទើបរកឃើញថ្មីមានជម្រៅ ១៩៦​ហ្វីត (ជិត ៦០ម៉ែត្រ) ដោយសង្ឃឹមថា វា​នឹងនាំទៅដល់កន្លែង​ដែលពួកគេសង្ស័យថា អ្នករុករករ៉ែទាំង ២នាក់នោះ អាចនឹងនៅ។

មន្ត្រីជួយសង្គ្រោះបាននិយាយថា ប្រតិបត្តិការជួយសង្គ្រោះនៅក្នុងរូងភ្នំនេះ ត្រូវបានផ្អាកអស់រយៈពេលជាច្រើនថ្ងៃហើយ ដោយសារតែភ្លៀងធ្លាក់ខ្លាំងរដូវ​មូសុង បានកើត​មាន​នៅ​ខេត្ត Xaisomboun របស់ប្រទេសនេះ​។ ហើយ​លោក Cuesta បានប្រាប់ប្រព័ន្ធ​ផ្សព្វផ្សាយ​ ABC News កាល​ពី​ព្រឹកថ្ងៃពុធថា មិនមានសញ្ញាថ្មីណាមួយ បង្ហាញពីកន្លែងដែលមនុស្ស​ ២ទៀតដែល​នៅ​តែបាត់ខ្លួន​ ស្ថិតនៅក្នុងរូងដ៏​តូចចង្អៀតនេះ​ឡើយ​។

គួរបញ្ជាក់​ថា ក្រុមអ្នកជួយសង្គ្រោះ បានឲ្យ​ដឹង​ថា ក្រុមអ្នករុករករ៉ែមាសខុសច្បាប់ទាំង​ ៧នាក់នោះ បានចូលទៅក្នុងរូងភ្នំនោះ កាលពី​ថ្ងៃទី១៩​ ខែឧសភា ហើយបានជាប់នៅក្នុង​នោះ នៅពេលដែលទឹក​ភ្លៀង បានជន់លិចច្រកចូលរូងភ្នំ។ ក្រុមស្វែងរក ឲ្យ​ដឹង​ថា ប្រតិបត្តិការ បានរកឃើញមនុស្ស ៥នាក់ ដោយ ២នាក់ទៀត​នៅតែមិន​ទាន់​រក​ឃើញ​៕