បើយោងតាមអង្គការសុខភាពពិភពលោក (WHO) កាលពីថ្ងៃពុធ (ទី៣ ខែមិថុនា ឆ្នាំ២០២៦) បាន​ឲ្យ​ដឹង​ថា សាធារណរដ្ឋប្រជាធិបតេយ្យកុងហ្គោ (DRC) បានរាយការណ៍ពីករណីឆ្លងជំងឺ Ebola សរុបចំនួន ៣៤៤ករណី ក្នុង​នោះ​រួមទាំងការស្លាប់ ៦០នាក់​ ហើយ​អ៊ូហ្គង់ដាមានករណីឆ្លងជំងឺសរុប ១៥ករណី ក្នុង​នោះ​ស្លាប់ ១ករណី។

ការផ្ទុះឡើងនៃ​ជំងឺនេះ បណ្តាលមកពីវីរុស Ebola ប្រភេទ Bundibugyo។ ហើយ​អគ្គនាយក WHO លោក Tedros Adhanom Ghebreyesus បានថ្លែងនៅក្នុងសន្និសីទសារព័ត៌មានមួយកាលពីថ្ងៃពុធថា ការផ្ទុះឡើងនៃជំងឺនេះ បានរីករាលដាលយ៉ាងឆាប់រហ័សនៅដំណាក់កាលដំបូង ហើយកិច្ចប្រឹងប្រែងទប់ស្កាត់ ដំបូងឡើយបានយឺតជាង​ល្បឿន​នៃ​ការ​រីករាលដាលរបស់​ជំងឺនេះ។

លោក​បាន​បន្ថែមថា ​ប៉ុន្តែក្រោមការដឹកនាំរបស់រដ្ឋាភិបាលកុងហ្គោ និងដោយមានការគាំទ្រពីសហគមន៍អន្តរជាតិ ការឆ្លើយតបទៅនឹងការផ្ទុះឡើងនៃជំងឺនេះ កំពុងទប់​ទល់​បាន​។ លោកបានឲ្យ​ដឹង​ទៀត​ថា អ្នកជំងឺចំនួន ៦នាក់ នៅក្នុងប្រទេសកុងហ្គោ បានជាសះស្បើយ និងត្រូវបានអនុញ្ញាតឲ្យ​ចេញពីមន្ទីរពេទ្យ ហើយអ្នកជំងឺ ២នាក់ នៅអ៊ូហ្គង់ដា បានជាសះស្បើយ។

យ៉ាងណាក៏ដោយ លោក Tedros បានកត់សម្គាល់ពីការមាន​បញ្ហាប្រឈមជាច្រើន ដែលរួមមានការពង្រីកសមត្ថភាពមន្ទីរពិសោធន៍ និងសមត្ថភាពវិនិច្ឆ័យ ដើម្បីកាត់បន្ថយការពន្យារពេល ក្នុងការបញ្ជាក់ករណី និងគាំទ្រការសម្រេចចិត្តឆ្លើយតបលឿនជាងមុន ការតាមដានទំនាក់ទំនងនៅកុងហ្គោ ការរឹតបន្តឹងការធ្វើដំណើរដែលកំពុងរំខានដល់ខ្សែច្រវាក់​ផ្គត់ផ្គង់ និងរារាំងការឆ្លើយតប ការមិនទុកចិត្តរបស់សហគមន៍ និងការណ៍​ដែលថា បច្ចុប្បន្នមិនមានវ៉ាក់សាំងដែលមានអាជ្ញាប័ណ្ណ ឬការព្យាបាលជាក់លាក់ សម្រាប់វីរុស​ប្រភេទ Bundibugyo នោះឡើយ​។

លោក Tedros បានបន្ថែម​ថា នៅកុងហ្គោ មានករណីឆ្លងចំនួន ៣៤៤ករណី រួមមាន​ការស្លាប់ ៦០ករណី នៅក្នុងតំបន់សុខភាពចំនួន ២៤ នៅទូទាំងខេត្តចំនួន ៣ ខណៈដែលចំនួនករណីសង្ស័យត្រូវបានកាត់បន្ថយមកត្រឹម ១១៦ករណី ពីជាង ១.០០០ករណីកាលពីសប្តាហ៍មុន៕