សហរដ្ឋអាមេរិកបានប្រកាសករណីដង្កូវស៊ីសាច់ក្នុងសត្វគោក្របីនៅរដ្ឋ Texas បង្កការប្រុងប្រយ័ត្នសម្រាប់ឧស្សាហកម្មបសុសត្វរបស់សហរដ្ឋអាមេរិកមួយនេះ ។

សត្វរុយបារ៉ាស៊ីតពងលើរបួសសត្វចិញ្ចឹម ហើយដង្កូវរបស់វាលូនចូលទៅជ្រៅក្នុងជាលិកាមានជីវិត បណ្តាលឲ្យមានការខូចខាតយ៉ាងធ្ងន់ធ្ងរ ហើយបើសិនជាមិនបានព្យាបាលទេនោះ សត្វនឹងត្រូវងាប់ ។

ក្រសួងកសិកម្មសហរដ្ឋអាមេរិកនិយាយថា ការរាតត្បាតនេះ ត្រូវបានរកឃើញនៅក្នុងសត្វគោនៅជិតព្រំដែនសហដ្ឋអាមេរិក-ម៉ិកស៊ិក ។

វាបានក្លាយជាករណីបញ្ជាក់លើកដំបូងនៅរដ្ឋ Texas ចាប់តាំងពីឆ្នាំ ១៩៦៦ ហើយវាជាក្តីបារម្ភធំ សម្រាប់អ្នកចិញ្ចឹមសត្វ ពេលដែលសត្វល្អិតនេះ ធ្វើដំណើរទៅទិសខាងជើងឆ្លងកាត់ម៉ិកស៊ិក ។

ក្រុមអាជ្ញាធរ បានចាត់វិធានការភ្លាមៗ ដោយដាក់សត្វឲ្យនៅដាច់ដោយឡែក បង្កើនការឃ្លាំមើល ហើយនិងព្យាបាលបសុសត្វ នៅតាមតំបន់រងផលប៉ះពាល់ ។

ក្រុមមន្រ្តីបង្កើនការផ្សព្វផ្សាយផងដែរ និងចូលរួមព្យាបាល ដើម្បីបញ្ឈប់ការរីករាលដាលប៉ារ៉ាស៊ីតនេះ ។

ដង្កូវស៊ីសាច់តែងតែលូនចូលតាមរបួស ហើយអាចធ្វើឲ្យប៉ះពាល់ដល់បសុសត្វ សត្វព្រៃ សត្វចិញ្ចឹម ហើយករណីកម្រ អាចកើតលើមនុស្សថែមទៀតផង ៕