គណបក្សប្រជាធិបតេយ្យ (Democratic Party) របស់ប្រធានាធិបតីកូរ៉េខាងត្បូង លោក Lee Jae Myung បានប្រមូលសន្លឹក​ឆ្នោត​មូលដ្ឋានដ៏​ច្រើន​លើស​លប់​ នៅក្នុងការបោះឆ្នោតដែលបានធ្វើឡើងកាល​ពី​ថ្ងៃពុធ (ទី៣ ខែមិថុនា ឆ្នាំ២០២៦) ប៉ុន្តែបានទទួល​លទ្ធផល​ខកចិត្ត​ ខណៈដែលលោក Oh Se-hoon ដែលជាអ្នកអភិរក្សនិយមរបស់​ក្រុម​ប្រឆាំង បានកាន់​តំណែងអភិបាលក្រុងសេអ៊ូលមួយ​អាណត្តិទៀត។

គណបក្សប្រជាធិបតេយ្យ បានឈ្នះចំនួន ១២ ក្នុងចំណោម ១៦ នៃ​ការប្រកួតប្រជែងដណ្ដើម​តំណែង​​អភិបាលក្រុង និងខេត្ត នៅ​ទូទាំងប្រទេស ខណៈដែលក្រុម​អភិរក្សនិយម គឺ​គណបក្សអំណាចប្រជាជន (People Power Party) បានឈ្នះ ៤តំណែង​ ជាលទ្ធផលដែលផ្តល់ឲ្យ​គណបក្សរបស់លោក Lee នូវការគ្រប់គ្រងយ៉ាងទូលំទូលាយ លើរដ្ឋបាលមូលដ្ឋាន ក្នុងរយៈពេល ១ឆ្នាំនៃការកាន់តំណែងប្រធានាធិបតីរបស់លោក​។

តែ​យ៉ាង​ណាក្ដី ការបាត់បង់​ក្រុងសេអ៊ូល ដែលជាទីក្រុងធំបំផុតរបស់ប្រទេស​កូរ៉េខាងត្បូង និងជាតំណែង​អភិបាលក្រុងដ៏​មាន​តម្លៃបំផុតខាង​នយោបាយ បានធ្វើឲ្យ​ជ័យជម្នះរបស់គណបក្សកាន់អំណាចចុះខ្សោយ និងផ្តល់ឲ្យ​ក្រុម​អភិរក្សនិយមនូវជំហរចាប់​ផ្ដើម​សំខាន់មួយ ខណៈពេលដែលពួកគេស្វែងរកការព្រឹង​ឡើងវិញ បន្ទាប់ពីមាន​រឿងអាស្រូវ ជុំវិញ​ការប៉ុនប៉ងចេញ​ច្បាប់​អាជ្ញាសឹកមិន​ជោគជ័យ ក្នុង​ឆ្នាំ២០២៤ របស់អតីតប្រធានាធិបតី លោក​ Yoon Suk Yeol និងការចោទប្រកាន់ជាបន្តបន្ទាប់។

មេដឹកនាំគណបក្សប្រជាធិបតេយ្យ លោក Jung Chung-rae បានថ្លែងអំណរគុណដល់អ្នកបោះឆ្នោតចំពោះអ្វីដែលលោកហៅថា ជា «ជ័យជម្នះដ៏អស្ចារ្យ» ទូទាំងប្រទេស ប៉ុន្តែបានទទួលស្គាល់មាន​ការ​ខក​ចិត្តខ្លាំង​ណាស់​​ ដែល​បាត់បង់តំណែង​គ្រប់​គ្រង​រដ្ឋធានី៕