ចៅក្រមនិយាយថា តុលាការនីហ្សេរីយ៉ា បានកាត់ទោសប្រហារជីវិតដោយចងក.បុរស ៤នាក់ ក្រោយការកាត់ទោសពួកគេ ក្នុងករណីវាយប្រហារឆ្នាំ ២០២២ លើព្រះវិហារកាតូលិក ក្នុងទីក្រុង Owo រដ្ឋភាគនិរតី Ondo ដែលបានសម្លាប់មនុស្សរាប់សិបនាក់ ។

ការសម្រេចនេះ ត្រូវបានគេមើលឃើញថា ជាការធ្វើតេស្តមួយចំពោះសមត្ថភាពរបស់នីហ្សេរីយ៉ា ក្នុងការកាត់ទោសករណីភេរវកម្ម ស្របពេលដែលប្រទេសមួយនេះ ស៊ូទ្រាំនឹងការបះបោរ និងអសន្តិសុខ សង្គម ។

លោកចៅក្រម Emeka Nwite សម្រេចកាត់ទោសប្រហារជីវិត ក្រោយរកឃើញចុងចោទបានប្រព្រឹត្តព្រហ្មទណ្ឌ ៩ករណី រួមទាំងការចាប់ចំណាប់ខ្មាំង ការចាប់ជម្រិត ហិរញ្ញប្បទានភេរវកម្ម និងការបន្ទុះគ្រាប់បែកបណ្តាលឲ្យស្លាប់មនុស្ស និងរងរបួស ។

បណ្តឹងតុលាការបង្ហាញថា បុរស ៤នាក់ រួមមានលោក Idris Abdulmalik Omeiza, Al Qasim Idris, Jamiu Abdulmalik និងលោក Abdulhaleem Idris ត្រូវបានចោទប្រកាន់លើករណីជាច្រើន ខណៈចុងចោទទី ៥ ត្រូវបានលើកលែងទោស ដោយសារគ្មានភ័ស្តុតាងគ្រប់គ្រាន់ ។ បុរសទាំងអស់នេះ បានផ្តល់ចម្លើយគ្មានទោស នៅពេលចាប់ផ្តើមការកាត់ក្តី ។

យោងតាមឯកសាររបស់តុលាការ បានឲ្យដឹងទៀតថា បុរសទាំង ៤រូប រងការចោទប្រកាន់ថា បានចូលរួមជាមួយក្រុមជីវពលអាហ្រ្វិកខាងកើត Al Shabaab កាលពីឆ្នាំ ២០២១ ហើយនិងបានរៀបចំផែនការវាយប្រហារលើទីតាំងផ្សេងទៀត រួមទាំងសាលារដ្ឋមួយកន្លែង ស្ថិតនៅភាគកណ្តាលនីហ្សេរីយ៉ា ហើយនិងតំបន់ជិតព្រះវិហារនៅចម្ងាយប្រហែល ៣០គ.មពីទីក្រុង Owo ៕