នគរបាល​អ៊ីស្រាអែលបានឲ្យ​ដឹងនៅ​ថ្ងៃព្រហស្បតិ៍ (ទី៤ ខែមិថុនា ឆ្នាំ២០២៦) នេះ​ថា បុរសជនជាតិ​ជ្វីហ្វជ្រុលនិយមរាប់សិបនាក់ ត្រូវបានឃុំខ្លួន បន្ទាប់ពីពួកគេបានលុកលុយ​ផ្ទះរបស់ចៅក្រមមួយ​រូប​របស់​តុលាការកំពូល ដើម្បីតវ៉ាប្រឆាំងនឹងការចាប់ខ្លួនអ្នកគេចកាតព្វកិច្ច​យោធាពី​សហគមន៍​របស់ពួកគេ។

ការវាយប្រហារនេះផ្តោតលើលោក Noam Sohlberg ដែល​ជាអនុប្រធានតុលាការកំពូល ហើយបានកើតឡើងកាលពី​យប់ថ្ងៃពុធ នៅក្នុងទីតាំង​តាំងទីលំនៅនៃ​ទីក្រុង​ Alon Shvut ក្នុងតំបន់ West Bank ដែលត្រូវបាន​កាន់កាប់ដោយអ៊ីស្រាអែល។

នគរបាល​បានឲ្យ​ដឹង​នៅ​ក្នុង​សេចក្តីថ្លែងការណ៍មួយនា​ថ្ងៃព្រហស្បតិ៍នេះ​ថា៖ «ស្នងការនគរបាល លោក​ឧត្តមសេនីយ៍ឯក Daniel Levi ថ្កោលទោសយ៉ាងខ្លាំង ចំពោះអំពើហិង្សា នៅឯ​គេហដ្ឋាន​របស់លោក Sohlberg។ សិទ្ធិក្នុងការតវ៉ាមិនត្រូវប្រែក្លាយទៅជាអំពើហិង្សា បង្កការខូចខាត ឬបង្កគ្រោះថ្នាក់ដល់មន្ត្រីសាធារណៈឡើយ»។

នៅក្នុងសេចក្តីថ្លែងការណ៍មួយកាលពីយប់ថ្ងៃពុធ នគរបាល​បានបញ្ជាក់​ថា «ក្រុមបាតុកររាប់សិបនាក់ បានរំខានដល់សន្តិភាព ហើយ​បាន​បំផ្លិច​បំផ្លាញផ្ទះសម្បែង​ និងទ្រព្យសម្បត្តិ» របស់លោក​ Sohlberg។ សេចក្តីថ្លែងការណ៍នេះបានបន្ថែម​ថា «មន្ត្រីនគរបាល​ដែលបានទៅ​ដល់កន្លែងកើតហេតុ បានឃុំខ្លួនជនសង្ស័យរាប់សិបនាក់ ហើយនាំពួកគេទៅ​សួរចម្លើយ»។

គួរបញ្ជាក់​ថា ក្រុមអ្នកតវ៉ាកំពុងធ្វើបាតុកម្មប្រឆាំងនឹងការចាប់ខ្លួនថ្មីៗ ចំពោះ​បុរសជនជាតិ​ជ្វីហ្វជ្រុល​និយម​វ័យក្មេង ដែលបានខកខានមិនបានរាយការណ៍ទៅកាន់មជ្ឈមណ្ឌលចុះឈ្មោះចូលបម្រើកងទ័ព បន្ទាប់ពីត្រូវបានកោះហៅឲ្យ​បំពេញកាតព្វកិច្ចយោធា៕