ទីភ្នាក់ងារសារព័ត៌មានរដ្ឋស៊ីនហួរ បានចុះផ្សាយនៅថ្ងៃសុក្រ ៥ មិថុនានេះ ថា លោកប្រធានាធិបតីចិន Xi Jinping នឹងទៅបំពេញទស្សនកិច្ចនៅកូរ៉េខាងជើងនៅថ្ងៃទី ៨ និង ៩ ខែមិថុនាខាងមុខនេះ ក្នុងដំណើរទស្សនកិច្ចក្រៅប្រទេសលើកដំបូងរបស់លោកក្នុងឆ្នាំនេះ។

ទូរទស្សន៍រដ្ឋចិន CCTV បាននិយាយថា "តបតាមការអញ្ជើញរបស់លោក Kim Jong Un លោក Xi Jinping អគ្គលេខាធិការនៃគណៈកម្មាធិការកណ្តាលបក្សកុម្មុយនិស្តចិន និងជាប្រធានាធិបតីនៃសាធារណរដ្ឋប្រជាមានិតចិន នឹងទៅបំពេញទស្សនកិច្ចផ្លូវរដ្ឋនៅសាធារណរដ្ឋប្រជាមានិតប្រជាធិបតេយ្យកូរ៉េ គឺកូរ៉េខាងជើង ចាប់ពីថ្ងៃទី ៨ ដល់ថ្ងៃទី ៩ ខែមិថុនា សប្ដាហ៍ក្រោយ។

នេះនឹងជាដំណើរទស្សនកិច្ចក្រៅប្រទេសលើកដំបូងរបស់លោក Xi ក្នុងឆ្នាំនេះ ហើយកើតឡើងភ្លាមៗបន្ទាប់ពីកិច្ចប្រជុំថ្មីៗរបស់លោកនៅទីក្រុងប៉េកាំងជាមួយប្រធានាធិបតីសហរដ្ឋអាមេរិក Donald Trump និងប្រធានាធិបតីរុស្ស៊ី លោក Vladimir Putin កាលពីខែឧសភាថ្មីៗនេះ។

ការបញ្ជាក់ពីដំណើរទស្សនកិច្ចរបស់លោក កើតឡើងបន្ទាប់ពីការរំពឹងទុកបានលេចចេញជារូបរាងក្នុងរយៈពេលប៉ុន្មានសប្តាហ៍ថ្មីៗនេះ ក្រោយមានរបាយការណ៍ប្រព័ន្ធផ្សព្វផ្សាយនានា និងការមើលឃើញគណៈប្រតិភូចិននៅទីក្រុងព្យុងយ៉ាង។

ក្រុមអ្នកវិភាគធ្លាប់បានប្រាប់សារព័ត៌មាន CNA ថា ដំណើរទស្សនកិច្ចរបស់លោក Xi ទៅកាន់ទីក្រុងព្យុងយ៉ាង នឹងបង្ហាញពីចេតនារបស់ទីក្រុងប៉េកាំងក្នុងការកែសម្រួលឥទ្ធិពលឡើងវិញលើកូរ៉េខាងជើង និងឧបទ្វីបកូរ៉េទាំងមូល។

លោក Xi បានទៅទស្សនកិច្ចកូរ៉េខាងជើងលើកចុងក្រោយនៅឆ្នាំ ២០១៩ ជាទីដែលរូបលោកបានជួបជាមួយមេដឹកនាំកូរ៉េខាងជើងលោក Kim និងពិធីទទួលស្វាគមន៍ដោយកងទ័ពកិត្តិយសដ៏ពេញលេញ។

ទន្ទឹមនឹងនេះ លោក Kim បានទៅទស្សនកិច្ចប្រទេសចិនកាលពីខែកញ្ញាឆ្នាំមុន ដើម្បីចូលរួមក្បួនព្យុហយាត្រាយោធាមួយ ដែលបានប្រារព្ធខួបលើកទី ៨០ នៃការបញ្ចប់សង្គ្រាមលោកលើកទី ២។ លោកបានជួបជាមួយលោក Xi ក្នុងអំឡុងពេលទស្សនកិច្ចនោះ៕