អាជ្ញាធរបាននិយាយកាលពីថ្ងៃព្រហស្បតិ៍ថា មនុស្សចំនួន ៤៩នាក់ បានស្លាប់ ដោយសារស្រេកទឹកនៅក្នុងស្រុកវាលខ្សាច់ Sahara ដាច់ស្រយាលមួយ ក្នុងប្រទេសនីហ្សេ បន្ទាប់ពីរថយន្តដែលដឹកពួកគេ បាន ខូច។

អ្នកស្លាប់ទាំងនោះស្ថិតក្នុងចំណោមក្រុមមួយក្រុមដែលត្រឡប់មកពីប្រទេសម៉ាលីសម្រាប់ពិធីបុណ្យមូស្លីម នៅពេលដែលពួកគេ ខ្វះទឹក។ នេះបើយោងតាមការបង្ហោះនៅលើហ្វេសប៊ុករបស់ខេត្ត Agadez។

សេចក្តីថ្លែងការណ៍បានបន្ថែមថា មនុស្ស ៤៩នាក់ «បានស្លាប់ ដោយសារស្រេកទឹក នៅក្នុងតំបន់ដាច់ស្រយាលមួយ ដែលមានចម្ងាយជាង ៨០គីឡូម៉ែត្រ (៥០ម៉ាយ) ភាគខាងលិចនៃរដ្ឋអាសាម៉ាកា (Assamaka)»។ រដ្ឋអាសាម៉ាកា គឺជាចំណុចឆ្លងកាត់សំខាន់រវាងប្រទេសនីហ្សេ និងអាល់ហ្សេរី ប៉ុន្តែក៏នៅជិតព្រំដែនម៉ាលីផងដែរ។

ខេត្ត Agadez បានរៀបរាប់លម្អិតថា៖«ដោយសារខ្វះទឹក និងមិនអាចជួសជុលរថយន្តបាន ទោះបីជាអ្នកបើកបរ ជំនួយការរបស់លោក និងអ្នកដំណើរ បានខិតខំប្រឹងប្រែងយ៉ាងណាក៏ដោយ ក៏អ្នកធ្វើដំណើរទាំងនោះ បានជាប់ខ្លួននៅកណ្តាលនៃបរិយាកាសដ៏អាក្រក់មួយ ដែលសីតុណ្ហភាពក្តៅខ្លាំង និងអវត្តមាននៃចំណុចផ្គត់ផ្គង់ ធ្វើឲ្យការរស់រានមានជីវិតជួបការលំបាកខ្លាំង» ដោយបន្ថែមថា ជនរងគ្រោះទាំងអស់ ត្រូវបានបញ្ចុះនៅក្នុងរណ្តៅធំៗ៕