ឯកអគ្គរដ្ឋទូតប៉ាឡេស្ទីនប្រចាំអង្គការសហប្រជាជាតិ ដែលត្រូវបានគាំទ្រដោយសមភាគីរបស់លោកមកពីប្រទេសអារ៉ាប់ និងមូស្លីម កាលពីថ្ងៃព្រហស្បតិ៍ បានអំពាវនាវឲ្យលោកប្រធានាធិបតីអាមេរិក ដូណាល់ ត្រាំ បញ្ឈប់អ៊ីស្រាអែលដាក់បញ្ចូលទឹកដីប៉ាឡេស្ទីនជារបស់ប្រទេសនេះ។

លោក Riyad Mansour បានប្រាប់សារព័ត៌មានថា៖«ខ្ញុំដឹងថា លោកប្រធានាធិបតី ដូណាល់ ត្រាំ មានសមត្ថភាព ហើយលោកមានសិទ្ធិអំណាចគ្រប់គ្រាន់ ក្នុងការបញ្ឈប់លោក បេនចាមីន ណេតាន់យ៉ាហ៊ូ ឲ្យដើរលើផ្លូវរបស់ខ្លួន ដើម្បីកុំឲ្យតំបន់ទាំងមូល ស្ថិតក្នុងភាពចលាចល...ហើយដើម្បីឆ្ពោះទៅរកសន្តិភាព និងយុត្តិធម៌ ដែលនេះហើយជាមូលហេតុដែលយើងភាគច្រើន កំពុងធ្វើការជាមួយពួកគេ»។

លោក Riyad Mansour បានប្រាប់សារព័ត៌មានថា៖«យើងដឹងថា លោក ត្រាំ បានប្រាប់នាយករដ្ឋមន្ត្រីអ៊ីស្រាអែល លោក ណេតាន់យ៉ាហ៊ូ នាពេលថ្មីៗនេះ ឲ្យបញ្ឈប់ធ្វើរឿងមិនសមហេតុផល នៅក្នុងប្រទេស លីបង់ បញ្ឈប់ស្ថានភាពវឹកវរបែបនេះ។ អ្នកដឹងថា អ្នកមិនត្រូវបានអនុញ្ញាតឲ្យបញ្ចូលទឹកដីនេះជារបស់ អ៊ីស្រាអែលបានទេ។

ក្រុមភូមិសាស្ត្រនយោបាយអារ៉ាប់របស់អង្គការសហប្រជាជាតិ បានចូលរួមជាមួយលោកឯកអគ្គរដ្ឋទូត ដើម្បីបង្ហាញពី «ការព្រួយបារម្ភយ៉ាងខ្លាំង» និងសាមគ្គីភាពក្នុងតំបន់ប្រឆាំងនឹង «ការកើនឡើងយ៉ាងឆាប់រហ័ស»នៃការឈ្លានពានរបស់អ្នកតាំងលំនៅអ៊ីស្រាអែល និងអំពើហិង្សាយោធាប្រឆាំងនឹងប្រជាជនប៉ាឡេស្ទីន៕