នាយករដ្ឋមន្ត្រី និងជារដ្ឋមន្ត្រីការបរទេសកាតា លោក Sheikh Mohammed bin Abdulrahman bin Jassim Al-Thani កាលពីថ្ងៃព្រហស្បតិ៍ បានអំពាវនាវឲ្យគ្រប់ភាគីទាំងអស់ឆ្លើយតបជាវិជ្ជមានចំពោះកិច្ចខិតខំប្រឹងប្រែងសម្របសម្រួលដែលកំពុងបន្តរវាងសហរដ្ឋអាមេរិក និងអ៊ីរ៉ង់។ នេះបើយោងតាមសេចក្តីថ្លែងការណ៍របស់ក្រសួងការបរទេសកាតា។

ក្នុងអំឡុងពេលនៃការសន្ទនាតាមទូរស័ព្ទជាមួយរដ្ឋមន្ត្រីការបរទេសទួរគី លោក Hakan Fidan លោក នាយករដ្ឋមន្ត្រីកាតា បាននិយាយថា កិច្ចខិតខំប្រឹងប្រែងសម្របសម្រួល នឹងបើកផ្លូវសម្រាប់ការដោះស្រាយមូលហេតុឫសគល់នៃវិបត្តិតាមរយៈការសន្ទនា និងឈានដល់កិច្ចព្រមព្រៀងប្រកបដោយចីរភាពដែលទប់ស្កាត់កើនឡើងភាពតានតឹងជាថ្មី។

ភាគីទាំងពីរក៏បានពិភាក្សាអំពីទំនាក់ទំនងទ្វេភាគី និងមធ្យោបាយពង្រឹងកិច្ចសហប្រតិបត្តិការផងដែរ។

ការសន្ទនាតាមទូរស័ព្ទនេះ បានកើតឡើង ស្របពេលមានកិច្ចខិតខំប្រឹងប្រែងការទូតដែលកំពុងបន្តដើម្បីបន្ធូរបន្ថយភាពតានតឹងរវាងសហរដ្ឋអាមេរិក និងអ៊ីរ៉ង់ និងទប់ស្កាត់ការកើនឡើងភាពតានតឹងបន្ថែមទៀត នៅក្នុងតំបន់៕