បើ​យោងតាមសេចក្តីថ្លែងការណ៍របស់កងទ័ពអ៊ីរ៉ង់ នៅថ្ងៃសុក្រ (ទី៥ ខែមិថុនា ឆ្នាំ២០២៦) នេះ បាន​ឲ្យ​ដឹង​ថា កងទ័ពជើងទឹកអ៊ីរ៉ង់ បានបាញ់ព្រមានដោយប្រើមីស៊ីល និងយានដ្រូន​ទៅកាន់នាវាពិឃាតអាមេរិកដែលកំពុងប្រតិបត្តិការ នៅសមុទ្រអូម៉ង់ ដោយបង្ខំឲ្យ​នាវា​ទាំង​នេះ​ចាក​ចេញពីតំបន់នោះ។

ការិយាល័យទំនាក់ទំនងសាធារណៈរបស់កងទ័ព បានឲ្យ​ដឹង​ថា ចំណាត់​ការ​នេះ គឺជាផ្នែកនៃប្រតិបត្តិការកំពុងបន្តមាន​ ដែល​ត្រូវបាន​ធ្វើឡើង ដើម្បីឆ្លើយតបទៅនឹងអ្វីដែលខ្លួនពិពណ៌នាថា ជាការបង្ក​ហេតុ​របស់សហរដ្ឋអាមេរិក នៅសមុទ្រនេះ​ និងការរឹបអូសនាវាពាណិជ្ជកម្ម​ និងដឹកប្រេងរបស់អ៊ីរ៉ង់។

យោងតាមសេចក្តីថ្លែងការណ៍នោះ បាន​ឲ្យ​ដឹង​ថា កងកម្លាំងកងទ័ពជើងទឹកអ៊ីរ៉ង់ បានបាញ់ព្រមានដោយប្រើមីស៊ីល Qadir និងយានដ្រូន​វាយប្រហារ Shahed Danesh ទៅកាន់នាវាពិឃាត DDG-103 និង DDG-87។ កងទ័ពបានអះអាងថា បន្ទាប់​មក​ នាវាទាំងនេះ​បានចាកចេញពីសមុទ្រអូម៉ង់ ហើយឆ្ពោះទៅមហាសមុទ្រឥណ្ឌា។

សេចក្តីថ្លែងការណ៍បានបន្ថែមថា ប្រតិបត្តិការនេះ រួមជាមួយនឹងវិធានការ​ស្រដៀងគ្នា ក្នុងរយៈពេលប៉ុន្មានថ្ងៃថ្មីៗនេះ ក៏បានបង្ខំឲ្យ​ធន​ធាន​កងទ័ពជើងទឹកអាមេរិកផ្សេងទៀតចាកចេញពីតំបន់នោះផងដែរ ក្នុង​នោះ​រួមទាំងនាវាពិឃាតដែលប្រតិបត្តិការជាផ្នែកនៃក្រុមវាយប្រហារលើ​នាវាផ្ទុកយន្តហោះ USS George H.W. Bush និងនាវាវាយប្រហារ Tripoli។

អ៊ីរ៉ង់បានចោទប្រកាន់កងកម្លាំងកងទ័ពជើងទឹកអាមេរិកថា បានរំខានដល់ពាណិជ្ជកម្ម និងសន្តិសុខតាមសមុទ្រ នៅក្នុងតំបន់នេះ​៕