បញ្ជាការដ្ឋានតំបន់​ឥណ្ឌូ-ប៉ាស៊ីហ្វិក (INDOPACOM) របស់សហរដ្ឋ​អាមេរិក បានឲ្យ​ដឹង​នៅ​ថ្ងៃសុក្រ (ទី៥ ខែមិថុនា ឆ្នាំ២០២៦) នេះថា កងកម្លាំងអាមេរិកបានធ្វើប្រតិបត្តិការទប់ស្កាត់​តាម​ផ្លូវសមុទ្រ និងបានឡើងលើនាវា «ជាប់​ទណ្ឌកម្មដែល​មិន​មែន​ជា​របស់​រដ្ឋណា​» នៅមហាសមុទ្រឥណ្ឌា។

INDOPACOM បានឲ្យ​ដឹង​នៅលើបណ្ដាញ​សង្គម X ថា កងកម្លាំងអាមេរិក បានអនុវត្ត «ការទប់ស្កាត់​តាម​ផ្លូវសមុទ្រ និងបាន​ឡើងដោយ​ស្រប​តាម​ច្បាប់អន្តរជាតិ​» លើនាវា MT DAVINA ដែលមានទីតាំងនៅមហាសមុទ្រឥណ្ឌា ក្នុងតំបន់ទទួលខុសត្រូវរបស់បញ្ជាការដ្ឋាននេះ​។

បញ្ជាការដ្ឋានបានបន្ត​ថា ប្រតិបត្តិការនេះបានកើតឡើង នាពេល​យប់ ប៉ុន្តែមិនបានផ្តល់ព័ត៌មានលម្អិតបន្ថែមទាក់ទងនឹងទំនិញ ក្រុមនាវិក ឬគោលដៅរបស់នាវានេះ​ឡើយ​។ INDOPACOM បានបញ្ជាក់​ថា វិធានការ​នេះ គឺជាផ្នែកមួយនៃកិច្ចប្រឹងប្រែងកាន់តែទូលំទូលាយ ដើម្បីរំខានដល់បណ្តាញផ្លូវសមុទ្រខុសច្បាប់ និងអនុវត្តទណ្ឌកម្ម​។

សេចក្តីថ្លែងការណ៍នេះបានឲ្យ​ដឹង​ទៀត​ថា៖ «យើងនឹងបន្តអនុវត្តច្បាប់ផ្លូវសមុទ្រសកល ដើម្បីរំខានដល់បណ្តាញខុសច្បាប់ និងហាមឃាត់នាវាដែលផ្តល់ការគាំទ្រផ្នែក​សម្ភារៈដល់អ៊ីរ៉ង់ មិនថា ពួកគេធ្វើប្រតិបត្តិការនៅទីណាក៏ដោយ»។

បញ្ជាការដ្ឋានបានសង្កត់ធ្ងន់ថា នាវាដែលត្រូវបានដាក់ទណ្ឌកម្ម និងអ្នកប្រព្រឹត្តិ នឹងមិនត្រូវបានអនុញ្ញាតឲ្យ​ប្រើប្រាស់ដែនទឹកអន្តរជាតិ ដើម្បីគេច​ពី​វិធានការអនុវត្តច្បាប់ឡើយ​៕