អ៊ីស្រាអែល និងសហរដ្ឋអាមេរិក បានចាប់ផ្តើមកិច្ចភិភាក្សាព្រាងក្របខ័ណ្ឌសហប្រតិបត្តិការសន្តិសុខថ្មី ដើម្បីជំនួសអនុស្សរណៈនៃការយោគយល់គ្នា (MoU) បច្ចុប្បន្ន ស្តីពីជំនួយយោធារបស់សហរដ្ឋអាមេរិក ដែលនឹងផុតកំណត់នៅឆ្នាំ២០២៨។

ក្រសួងការពារជាតិអ៊ីស្រាអែល បានបញ្ជាក់នៅ​ថ្ងៃសុក្រ (ទី៥ ខែមិថុនា ឆ្នាំ២០២៦) នេះ​ថា មាន «កិច្ចពិភាក្សាជាផ្លូវការ ស្តីពីក្របខ័ណ្ឌសហប្រតិបត្តិការសន្តិសុខថ្មី ដើម្បីជំនួសអនុស្សរណៈនៃការយោគយល់គ្នា ដែលមានស្រាប់»។ ក្រសួងបាន​ឲ្យ​ដឹងបន្ត​ថា៖ «ទីប្រឹក្សាក្រសួងការបរទេស លោក Daniel Holler និងឯកអគ្គរដ្ឋទូតសហរដ្ឋអាមេរិក ប្រចាំប្រទេសអ៊ីស្រាអែល លោក Mike Huckabee នឹងដឹកនាំក្រុមរបស់​សហរដ្ឋអាមេរិក»។

ក្រសួងបានឲ្យ​ដឹង​ថា៖ «ភាគីទាំង២ បានធ្វើកិច្ចប្រជុំផ្លូវការលើកដំបូង នៅសប្តាហ៍នេះ។ ការ​ជួប​ជុំ​បន្ថែមទៀត ត្រូវបានគ្រោងទុក នៅក្នុងប្រទេសទាំង២ នៅក្នុងសប្តាហ៍ខាងមុខ។ កិច្ចព្រមព្រៀងដែលកំពុងពិភាក្សា មានគោលបំណងពង្រឹងគុណភាពយោធារបស់យោធាអ៊ីស្រាអែល។

ទីក្រុងវ៉ាស៊ីនតោន បានប្រាប់​នៅ​មុននេះ​ថា អនុស្សរណៈនៃការយោគយល់គ្នាបន្ទាប់ នឹងផ្លាស់ប្តូរពីជំនួយប្រពៃណីទៅអ៊ីស្រាអែល ហើយផ្តល់អាទិភាពដល់ពាណិជ្ជកម្ម។

គួរបញ្ជាក់​ថា អ៊ីស្រាអែលទទួលបានជំនួយយោធាប្រមាណ ៣,៨ពាន់លានដុល្លាររៀងរាល់ឆ្នាំពីសហរដ្ឋអាមេរិក​។ ហើយ​ប្រទេស​នេះ​បានទទួលជំនួយយោធាបន្ថែមរាប់ពាន់លានដុល្លារ បន្ទាប់ពីមាន​សង្គ្រាមរបស់ខ្លួន នៅតំបន់​ហ្កាហ្សា រួម​ជាមួយទាំង​​នៅក្នុង​ប្រទេស​លីបង់ និងអ៊ីរ៉ង់៕