ទីភ្នាក់ងារថាមពលរដ្ឋអាតូមិកអន្តរជាតិ(IAEA) និយាយនៅថ្ងៃសុក្រនេះថា ពួកគេបានចរចាលើបទឈប់បាញ់ក្នុងស្រុកបណ្តោះអាសន្ន រវាងអ៊ុយក្រែន និងរុស្ស៊ី ដែលជាការចរចាលើកទី ៦ ចាប់តាំងពីចុងឆ្នាំមុន ដើម្បីអនុញ្ញាតឲ្យជួសជុលបណ្តាញផ្គត់ផ្គង់ថាមពលទៅកាន់រោងចក្រថាមពលនុយក្លេអ៊ែរ Zaporizhzhia របស់អ៊ុយក្រែន ។

លោក Rafael Grossi គឺជាអគ្គនាយកទីភ្នាក់ងារ IAEA និយាយក្នុងជំនួបក្រុមប្រឹក្សាភិបាលនៅទីក្រុងវីយែន ប្រទេសអូទ្រីសថា បទឈប់បាញ់នេះ នឹងអនុញ្ញាតឲ្យក្រុមអ្នកជំនាញ និងក្រុមបច្ចេកទេសមកពីភាគីទាំង ២ ចាប់ផ្តើមជួសជុលផ្នែកសំខាន់ៗនៃបណ្តាញថាមពល Dniprovska ។ វាគឺជាបណ្តាញថាមពលកម្លាំង ៧៥០គីឡូវ៉ុល ។

សារនៅលើបណ្តាញព័ត៌មានសង្គម X និយាយថា ការជួសជុលបណ្តាញថាមពលដែលរងការខូចខាតដោយសារសង្រ្គាម នឹងត្រូវចាប់ផ្តើម ក្រោយពេលការដោះមីនរួចរាល់នៅតំបន់នោះ ។

សូមបញ្ជាក់ថា បណ្តាញផ្គត់ផ្គង់ថាមពលនេះ ត្រូវបានផ្តាច់កាលពីរយៈពេលជាង ២ខែមុន ធ្វើឲ្យរោងចក្រថាមពលនុយក្លេអ៊ែរធំបំផុតរបស់អឺរ៉ុបមួយនេះ ពឹងផ្អែកលើតែបណ្តាញថាមពលកម្លាំង ៣៣០គីឡូវ៉ុលប៉ុណ្ណោះ ដើម្បីផ្គត់ផ្គង់ថាមពលអគ្គិសនិត្រូវការ ដើម្បីធ្វើឲ្យត្រជាក់ម៉ាស៊ីនរ៉េអាក់ទ័រចំនួន ៦ដែលបានបិទ ៕