កម្មវិធីស្បៀងអាហារពិភពលោក(WFP)របស់អង្គការសហប្រជាជាតិនិយាយនៅថ្ងៃសុក្រនេះថា ជម្លោះតំបន់មជ្ឈិមបូព៌ា បានជំរុញមនុស្សរាប់លាននាក់ជិតធ្លាក់ក្នុងភាពអត់ឃ្លាន ខណៈតម្លៃប្រេង និងតម្លៃដឹកជញ្ជូនហក់ឡើងខ្ពស់ ធ្វើឲ្យតម្លៃស្បៀងអាហារឡើងថ្លៃដូចគ្នា ហើយការផ្តល់មូលនិធិធ្លាក់ចុះ បង្ខំឲ្យទីភ្នាក់ងារជំនួយ កាត់បន្ថយជំនួយរបស់ពួកគេ ។

ការវាយប្រហាររួមគ្នារបស់សហរដ្ឋអាមេរិក និងអ៊ីស្រាអែលលើអ៊ីរ៉ង់កាលពីខែកុម្ភៈ បង្កឲ្យមានជម្លោះក្នុងតំបន់នៅទូទាំងតំបន់ឈូងសមុទ្រ និងនៅលីបង់ ធ្វើឲ្យបង្អាក់ដល់ការដឹកជញ្ជូន រួមទាំងនៅច្រកសមុទ្រ Hormuz ផងដែរ បង្ខំឲ្យនាវាផ្លាស់ប្តូរផ្លូវធ្វើនាវាចរណ៍ និងរឹតត្បិតភ្លាមៗលំហូរថាមពលសកល និងខ្សែចង្វាក់ផ្គត់ផ្គង់ ។

កាលពីខែមីនា WFP ព្យាករថា មនុស្សប្រហែល ៤៥លាននាក់ អាចនឹងធ្លាក់ក្នុងអសន្តិសុខស្បៀងធ្ងន់ធ្ងរ បើសិនជាប្រេងបន្តនៅមានតម្លៃប្រហែល ១០០ដុល្លារ ក្នុង ១បារ៉ែល រហូតដល់ខែមិថុនានេះ ។

ទីភ្នាក់ងារមួយនេះ បន្តថា បច្ចុប្បន្នសេណារីយោមួយនេះ បានលេចចេញជារូបរាងហើយ ពេលដែលតម្លៃប្រេងឆៅបន្តស្ថិតនៅលើកម្រិត ១០០ដុល្លារក្នុង ១បារ៉ែល ចាប់តាំងពីដើមខែមីនារហូតមក ។

គ្រួសារនៅអាហ្វហ្គានីស្ថាន សូម៉ាលី និងស្រីលង្កា ស្ថិតក្នុងចំណោមពលរដ្ឋរងផលប៉ះពាល់ធ្ងន់ធ្ងរជាងគេបំផុត ហើយនិងប្រឈមសម្ពាធបន្ថែមទៀត ដោយសារតម្លៃប្រេង និងស្បៀងអាហារហក់ឡើងខ្ពស់ ខណៈបាត់បង់ប្រាក់ចំណូល និងពាណិជ្ជកម្មរងការអាក់ខាន ៕