កងកម្លាំងការពារអ៊ីស្រាអែល បាននិយាយកាលពីថ្ងៃសុក្រថា ខ្លួនបានសម្លាប់ប្រធានអង្គភាពវិស្វកម្មរបស់ក្រុមហេសបូឡា គឺលោក Abed Harb។

សេចក្តីថ្លែងការណ៍មួយដែលចេញដោយយោធា បានបញ្ជាក់ថា លោក Harb ត្រូវបានសម្លាប់ នៅក្នុងការវាយប្រហារតាមអាកាស កាលពីសប្តាហ៍មុន។

យោធាបាននិយាយថា លោក Harb បានត្រួតពិនិត្យការប្រមូលផ្តុំនិងការដាក់ពង្រាយគ្រឿងផ្ទុះដែលមានបំណងកំណត់គោលដៅទាហានអ៊ីស្រាអែលនៅភាគខាងត្បូងប្រទេសលីបង់ ដោយចោទប្រកាន់លោកពីបទពាក់ព័ន្ធនឹងការវាយប្រហារប្រឆាំងនឹងកងកម្លាំងអ៊ីស្រាអែល ដែលមានតាំងពីសង្គ្រាមឆ្នាំ ២០០៦ ជាមួយអ៊ីស្រាអែល។

យោធាបានបន្ថែមថា កងទ័ពអាកាសអ៊ីស្រាអែល បានវាយប្រហារ និងបំផ្លាញជើងទម្របាញ់រ៉ូកែតមួយគ្រឿង នៅពេលយប់ ដែលត្រូវបានប្រើប្រាស់ដោយក្រុមសកម្មប្រយុទ្ធហេសបូឡា ដើម្បីបាញ់រ៉ូកែតទៅកាន់កងទ័ពអ៊ីស្រាអែលដែលកំពុងប្រតិបត្តិការនៅភាគខាងត្បូងប្រទេសលីបង់។

ក្រុមហេសបូឡាមិនបានធ្វើអត្ថាធិប្បាយអំពីការអះអាងរបស់អ៊ីស្រាអែលទេ៕