គណៈរដ្ឋមន្ត្រីកូរ៉េខាងត្បូង នៅថ្ងៃអង្គារ (ទី៩ ខែមិថុនា ឆ្នាំ២០២៦)​ នេះ បានសម្រេច​អនុម័តក្រឹត្យ ស្ដី​ពីការ​​អនុវត្តច្បាប់ពិសេសមួយ ដែលភ្ជាប់ទៅនឹងការសន្យាវិនិយោគចំនួន ៣៥០ពាន់លានដុល្លាររបស់ប្រទេសនេះ ចំពោះសហរដ្ឋអាមេរិក ដោយបើកផ្លូវឲ្យ​ចាប់​ផ្ដើម​មាន​ការអនុវត្ត នៅចុងខែនេះ។​ នេះបើយោងតាមប្រព័ន្ធផ្សព្វផ្សាយក្នុងស្រុក។

សារព័ត៌មាន Yonhap News ដោយសំអាង​ដល់​ក្រសួងហិរញ្ញវត្ថុ បាន​រាយការណ៍​ថា ក្រឹត្យនេះកើតឡើងបន្ទាប់ពីមាន​ច្បាប់ពិសេស ស្ដីពី​ការគ្រប់គ្រងការវិនិយោគយុទ្ធសាស្ត្រកូរ៉េ-អាមេរិក ដែលត្រូវបានអនុម័តដោយរដ្ឋសភា កាលពីខែមីនា និង​ដែលគ្រោងចូលជាធរមាននៅថ្ងៃទី១៨ ខែមិថុនា។

គួរបញ្ជាក់​ថា កញ្ចប់វិនិយោគនេះ​ត្រូវបានព្រមព្រៀងគ្នា រវាងទីក្រុងសេអ៊ូល និងវ៉ាស៊ីនតោន កាលពីខែតុលា ឆ្នាំមុន ដែលជាផ្នែកនៃកិច្ចព្រមព្រៀងពាណិជ្ជកម្មដ៏​ទូលំទូលាយ ដែលកូរ៉េខាងត្បូងបានសន្យាថា នឹងវិនិយោគនៅសហរដ្ឋអាមេរិក ជាថ្នូរនឹងការទម្លាក់​អត្រា​ពន្ធរបស់សហរដ្ឋអាមេរិក។

ផែនការនេះ រួមមាន​ទឹក​ប្រាក់​ ១៥០ពាន់លានដុល្លារ សម្រាប់កិច្ចសហប្រតិបត្តិការសាងសង់នាវា និង ២០០ពាន់លានដុល្លារ សម្រាប់គម្រោងនៅក្នុងវិស័យយុទ្ធសាស្ត្រផ្សេងទៀត។ ហើយ​បើ​យោងតាមក្រសួងហិរញ្ញវត្ថុ បាន​ឲ្យ​ដឹង​ថា ច្បាប់ ស្ដីពី​ការ​អនុវត្តនេះ បានបង្ហាញពី​​​លក្ខណៈវិនិច្ឆ័យ ដើម្បី​កំណត់ «លទ្ធភាពពាណិជ្ជកម្ម» នៃគម្រោងដែលត្រូវបានស្នើឡើង នៅសហរដ្ឋអាមេរិក៕