មន្ត្រីសន្តិសុខបាននិយាយនៅថ្ងៃអង្គារនេះថា ក្រុមសកម្មប្រយុទ្ធ Tehreek-i-Taliban Pakistan (TTP) បានសម្លាប់បុគ្គលិកយោធាប៉ារ៉ាចំនួន ៦នាក់ និងចាប់ពង្រត់មនុស្ស ៨ នាក់ ផ្សេងទៀត ក្នុងអំឡុងពេលវាយប្រហារលើចំណុចត្រួតពិនិត្យមួយ នៅភាគពាយ័ព្យនៃប្រទេសប៉ាគីស្ថាន។

ដោយសារតែពួកគេមិនត្រូវបានអនុញ្ញាតឲ្យនិយាយទៅកាន់ប្រព័ន្ធផ្សព្វផ្សាយ មន្ត្រីសន្តិសុខម្នាក់បានប្រាប់សារព័ត៌មាន AFP ក្នុងលក្ខខណ្ឌអនាមិកថា សមាជិករាប់សិបនាក់នៃក្រុមសកម្មប្រយុទ្ធនេះ ដែលអះអាងទទួលខុសត្រូវចំពោះការវាយប្រហារនោះ បានវាយលុកចំណុចត្រួតពិនិត្យមួយ នៅក្នុងទីក្រុង Peshawar ជាមួយនឹងអាវុធ គ្រាប់បែកដៃ និងគ្រាប់កាំភ្លើងត្បាល់ កាលពីថ្ងៃចន្ទ។

មន្ត្រីសន្តិសុខទី២ម្នាក់ទៀត បាននិយាយថា៖«បុគ្គលិកចំនួន ៦នាក់នៃកងកម្លាំងសហព័ន្ធ (FC) ត្រូវបានសម្លាប់ និង ៤នាក់ផ្សេងទៀត រងរបួស នៅក្នុងការវាយប្រហារដែលធ្វើឡើងដោយក្រុមសកម្មប្រយុទ្ធប្រដាប់អាវុធ» ដោយសំដៅទៅលើកងកម្លាំងប៉ារ៉ារបស់ប៉ាគីស្ថាន ដែលរួមចំណែកដល់សន្តិសុខជួរមុខភាគច្រើន នៅក្នុងខេត្ត Khyber Pakhtunkhwa ដែលមានព្រំប្រទល់ជាប់នឹងប្រទេសអាហ្វហ្គានីស្ថាន។

ប្រភពទី២ បាននិយាយថា៖«ក្រុមសកម្មប្រយុទ្ធបានចាប់ពង្រត់បុគ្គលិក ៨នាក់របស់កងកម្លាំងសហព័ន្ធ

ហើយនាំពួកគេទៅកាន់ទីតាំងដែលមិនបានបង្ហាញ»៕