ប្រព័ន្ធផ្សព្វផ្សាយក្នុងស្រុក បាន​រាយការណ៍​ថា កងទ័ពប៉ារ៉ាយ៉ាងហោចណាស់ ៦នាក់ ត្រូវបានសម្លាប់ ហើយ​ ៣នាក់ទៀតត្រូវបានចាប់ជាចំណាប់ខ្មាំង អំឡុង​ការវាយប្រហារលើប៉ុស្តិ៍ត្រួតពិនិត្យសន្តិសុខមួយកន្លែង​ នៅភាគពាយ័ព្យនៃ​ប្រទេសប៉ាគីស្ថាន នាថ្ងៃអង្គារ (ទី៩ ខែមិថុនា ឆ្នាំ២០២៦)​ នេះ។

ហេតុការណ៍នេះបានកើតឡើងនៅជាយក្រុង Peshawar ដែលជាទី​ក្រុង​របស់​ខេត្ត Khyber Pakhtunkhwa ភាគពាយ័ព្យ ដែលមាន​ព្រំប្រទល់​ជាប់នឹងប្រទេសជិត​ខាង​អាហ្វហ្គានីស្ថាន។​ នេះបើយោងតាមសារព័ត៌មាន​ជា​ភាសាអង់គ្លេសក្នុងស្រុក Dawn ដែលបានដកស្រង់ប្រភពដែល​និយាយ​ក្នុង​លក្ខ​ខណ្ឌមិនបញ្ចេញឈ្មោះ។

សារព័ត៌មាន​នេះ​ បាន​ឲ្យ​ដឹង​ទៀត​ថា ជនសង្ស័យជាសកម្មប្រយុទ្ធចំនួន ៨នាក់ ត្រូវបានសម្លាប់ អំឡុង​ការប៉ះទង្គិចគ្នានេះ ខណៈដែលកងទ័ពប៉ារ៉ា ៤នាក់ បានរងរបួស។ ហើយ​បើយោងតាម​សារព័ត៌មាន​ដដែល​នេះ​ដែលបានសំអាង​ដល់​ប្រភព បានបន្ថែម​ថា កម្លាំងសន្តិសុខបាន «កម្ចាត់​» ការប៉ុនប៉ងរបស់ពួកសកម្មប្រយុទ្ធ ក្នុងការដណ្តើមកាន់កាប់​ប៉ុស្តិ៍នេះ ។

រហូតមកដល់ពេលនេះ មិនទាន់មានក្រុមណាមួយចេញ​មុខ​មក​អះអាងទទួលខុសត្រូវនៅឡើយ​ទេ​ ចំពោះការវាយប្រហារនេះ ទោះបីជាក្រុម​ Tehreek-e-Taliban Pakistan ដែលជាសម្ព័ន្ធភាពរបស់​​ក្រុមសកម្មប្រយុទ្ធជាច្រើន នៅក្នុងប្រទេសប៉ាគីស្ថាន បានចូលរួមក្នុងការវាយប្រហារបែបនេះ ក្នុងរយៈពេលប៉ុន្មានឆ្នាំថ្មីៗនេះក៏ដោយ​៕