គណៈកម្មការអឺរ៉ុប នៅថ្ងៃអង្គារ (ទី៩ ខែមិថុនា ឆ្នាំ២០២៦) បានអំពាវនាវឲ្យ​មានការអនុវត្តយ៉ាង​ពេញលេញនូវ​សេចក្តីសម្រេចលេខ១៧០១ របស់ក្រុមប្រឹក្សាសន្តិសុខអង្គការសហប្រជាជាតិ (UNSC) ដោយសង្កត់ធ្ងន់លើតម្រូវការ ក្នុងការគោរពអធិបតេយ្យភាព និងបូរណភាពទឹកដីរបស់ប្រទេសលីបង់ បន្ទាប់ពីមាន​នូវ​កិច្ចព្រមព្រៀងបទ​ឈប់បាញ់សម្របសម្រួលដោយសហរដ្ឋអាមេរិក រវាងលីបង់ និងអ៊ីស្រាអែល។

ដោយស្វាគមន៍ចំពោះបទឈប់បាញ់ ដោយ​ចាត់​ទុក​ជាឱកាសថ្មី ដើម្បីបញ្ចប់ជម្លោះ អ្នកនាំពាក្យគណៈកម្មការ EU លោក Anouar El Anouni បានជំរុញឲ្យ​គ្រប់ភាគីទាំងអស់គោរពតាមកិច្ចព្រមព្រៀងនេះយ៉ាងពេញលេញ និងបញ្ឈប់ប្រតិបត្តិការយោធាជាបន្ទាន់។

នៅក្នុងសន្និសីទសារព័ត៌មានមួយ លោក El Anouni បានប្រាប់អ្នកសារព័ត៌មានថា៖ «យើងជឿជាក់ថា អ៊ីស្រាអែល និងលីបង់ នឹងបន្តការចរចាដោយផ្ទាល់ ក្នុងស្មារតីស្ថាបនា។ តែ​យ៉ាង​ណាក្ដី ដោយពិនិត្យមើលស្ថានភាពដែលយើងមាននៅចំពោះមុខ យើងជំរុញឲ្យ​តួអង្គទាំងអស់គោរពតាមលក្ខខណ្ឌនៃកិច្ចព្រមព្រៀងនេះយ៉ាងពេញលេញ ហើយវិធានការ​យោធាទាំងអស់គួរតែបញ្ឈប់ជាបន្ទាន់»។

លោក El Anouni បានបន្ថែមថា៖ «យើងក៏ទាមទារផង​ដែរឲ្យ​មានការអនុវត្តយ៉ាង​ពេញលេញនូវ​សេចក្តីសម្រេចលេខ១៧០១ របស់ក្រុមប្រឹក្សាសន្តិសុខអង្គការសហប្រជាជាតិ ដែលអំពាវនាវឲ្យ​មានការគោរពអធិបតេយ្យភាព និងបូរណភាពទឹកដីរបស់ប្រទេសលីបង់»។

ជាមួយ​គ្នានេះ លោកក៏បានអំពាវនាវឲ្យ​ក្រុមហេសបូឡារបស់លីបង់ដកចេញ​ពីតំបន់ភាគខាងត្បូងនៃទន្លេ Litani និងឲ្យ​អ៊ីស្រាអែលដកចេញ​ពីទឹកដីលីបង់៕