​

យោងតាមទិន្នន័យផ្លូវការដែលចេញផ្សាយដោយក្រសួងសុខាភិបាល នៅថ្ងៃអង្គារ (ទី៩ ខែមិថុនា ឆ្នាំ២០២៦) នេះ បាន​ឲ្យ​ដឹង​ថា ចំនួនអ្នកស្លាប់ដោយសារការផ្ទុះឡើងនូវ​ជំងឺ Ebola ក្នុង​ប្រទេស​សាធារណរដ្ឋប្រជាធិបតេយ្យកុងហ្គោ បានមាន​លើសពី ១០០នាក់ហើយ​។

ក្រសួងបានឲ្យ​ដឹង​ថា មនុស្ស ១០១នាក់បានបាត់បង់ជីវិត​ដោយសារជំងឺនេះ ចាប់តាំងពីការផ្ទុះឡើង ត្រូវបានប្រកាសនៅថ្ងៃទី១៥ ខែឧសភា ដោយអត្រាមរណភាពសរុបត្រូវបានប៉ាន់ប្រមាណថា មាន ១៨,៤ភាគរយ​។ ជាមួយ​គ្នានេះ ទិន្នន័យបានបង្ហាញថា ចំនួនសរុបនៃករណីដែលត្រូវ​បានបញ្ជាក់ បានឡើង​ដល់ ៥៥០នាក់។

ការផ្ទុះឡើងនៅតែបន្តរីករាលដាល ហើយឥឡូវនេះបានប៉ះពាល់ដល់តំបន់សុខភាពចំនួន ២៥ នៅក្នុងខេត្ត Ituri, North Kivu និង South Kivu។ ហើយ​ក្រសួងបានឲ្យ​ដឹង​ទៀត​ថា អ្នកជំងឺចំនួន ៧នាក់ បានជាសះស្បើយ ក្នុងរយៈពេល ២៤ម៉ោងកន្លងមកនេះ​ ដែលនាំឲ្យ​ចំនួនសរុបនៃការជាសះស្បើយ ឡើង​ដល់​ ១៩នាក់​។

គួរ​បញ្ជាក់ថា បើយោងតាមអាជ្ញាធរសុខាភិបាល បាន​ឲ្យ​ដឹង​ថា ការផ្ទុះឡើងដែលបង្កឡើងដោយវីរុសជំងឺ Ebola ប្រភេទ Bundibugyo នៅតែមាននិន្នាការកើនឡើងជារៀងរាល់សប្តាហ៍។ ស្ថាប័ននេះ​បានបន្ថែម​ថា ការធ្លាក់ចុះបន្តិចបន្តួចថ្មីៗនេះ អាចដោយសារ​ការពន្យារពេលការធ្វើបច្ចុប្បន្នភាពទិន្នន័យរបស់​មន្ទីរពិសោធន៍។

ក្រសួងបានសង្កត់ធ្ងន់​ថា វិធានការ​តាម​ឃ្លាំមើល ការគ្រប់គ្រងករណី និងកិច្ចប្រឹងប្រែងលើក​កម្ពស់​ការ​យល់ដឹង សម្រាប់​សហគមន៍ នៅតែបន្តមាន​នៅក្នុងតំបន់ដែលរងផលប៉ះពាល់៕