អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ (Thaksin Shinawatra) នឹង​មាន​សេរីភាព​នៅថ្ងៃអង្គារ (ទី៩ ខែមិថុនា ឆ្នាំ២០២៦) នេះ​ បន្ទាប់ពីឧបករណ៍តាម​ដាន​អេឡិចត្រូនិចរបស់លោក ត្រូវបានដោះចេញ ដែលបានបញ្ចប់ជំហានចុងក្រោយនៃដំណើរការដោះលែងរូបលោក ក្រោមការលើកលែងទោសពី​អង្គ​ព្រះមហាក្សត្រ។ នេះបើយោងតាមប្រព័ន្ធផ្សព្វផ្សាយក្នុងស្រុក។

របាយការណ៍ព័ត៌មានរបស់ក្រសួងយុត្តិធម៌ថៃ បានឲ្យ​ដឹង​នៅថ្ងៃទី៩ ខែមិថុនាថា គណៈកម្មាធិការ ៣ភាគី ក្រោមព្រះរាជក្រឹត្យ ស្តីពីការផ្តល់ការលើកលែងទោសរបស់​អង្គ​ព្រះមហាក្សត្រ ត្រូវពិចារណា និងផ្ទៀងផ្ទាត់បញ្ជីឈ្មោះមនុស្សទូទាំងប្រទេស ដែលបំពេញតាមលក្ខខណ្ឌ​ សម្រាប់ដំណើរ​ការលើកលែងទោស។

របាយការណ៍ដែល​ចេញ​នៅថ្ងៃត្រង់ទី៩ ខែមិថុនានេះ​ បានឲ្យដឹង​ថា តុលាការព្រហ្មទណ្ឌ Thon Buri Criminal Court កំពុងពិនិត្យ និងផ្ទៀងផ្ទាត់បញ្ជីឈ្មោះបុគ្គល​ ដែលទទួល​បាន​ការ​លើកលែងទោស ក្នុង​នោះរួមមាន​ទាំងលោក ថាក់ស៊ីន ផងដែរ។ របាយការណ៍ពី​ការវិវត្ត​​ចុងក្រោយបំផុត បានឲ្យ​ដឹង​ថា នៅម៉ោងប្រហែល ២រសៀល ម៉ោង​ក្នុង​ស្រុក​ លោក ថាក់ស៊ីន ត្រូវ​បានដោះខ្សែដៃតាមដាន​អេឡិចត្រូនិចទាំងស្រុង​ នៅចំពោះមុខមន្ត្រី​ត្រួត​ពិនិត្យ​​។

គួរបញ្ជាក់​ថា អតីតនាយករដ្ឋមន្ត្រីរូបនេះ ស្ថិតនៅក្រោមការតាម​ដាន​ អំឡុង​រយៈពេលនៃ​ការ​​ដោះលែង​ដោយមាន​លក្ខខណ្ឌ ហើយស្ថិតក្នុងចំណោមអ្នកដែលត្រូវបានដោះលែង ក្រោមការលើកលែងទោសពី​អង្គព្រះមហាក្សត្រ ក្នុងខែឧសភា ដោយសារតែលោកនៅសល់រយៈពេល​ជាប់​ទោសមិន​ដល់​មួយឆ្នាំទៀតទេ​៕