លោក Koji Gyotoku គ្រូបង្វឹកក្រុមជម្រើសជាតិកម្ពុជា បានបង្ហាញមោទនភាពចំពោះកូនក្រុម ដែលព្យាយាមអស់ពីកម្លាំងកាយចិត្ត រហូតបានយកឈ្នះក្រុមជម្រើសកោះហុងកុង ដោយលទ្ធផល ២-០ ក្នុងជំនួបមិត្តភាពអន្ដរជាតិ កាលពីរាត្រីថ្ងៃទី៩ ខែមិថុនាកន្លងទៅ គ្រាដែលលោក Roberto Losada គ្រូបង្វឹកក្រុមហុងកុង បានត្រឹមសោកស្ដាយ ចំពោះលទ្ធផលដ៏ខកចិត្ត ដ្បិតកូនក្រុមខ្លួនធ្វើបានល្អក៏ដោយ។

នេះគឺជាការបើកទំព័រប្រវត្តិសាស្ដ្រថ្មី សម្រាប់ក្រុមបាល់ទាត់ជម្រើសជាតិកម្ពុជា ដែលបានយកឈ្នះក្រុមហុងកុង លើកដំបូង ក្រោយរង់ចាំអស់រយៈពេល ៦៩ឆ្នាំ ។ សម្រាប់គ្រាប់បាល់ ២គ្រាប់ ដែលជួយឲ្យក្រុមគោព្រៃកម្ពុជា បញ្ចប់កំណត់ត្រាមិនស្គាល់ឈ្នះនេះ រកបានដោយកីឡាករ Yudai Ogawa នៅនាទី៤១+១ និង សៀង ចន្ធា នៅនាទី៥០ ។ រីឯហុងកុង ក៏ព្យាយាមវាយសម្រុកផងដែរ តែមិនអាចទម្លាយរបាំងការពារក្រុមម្ចាស់ផ្ទះកម្ពុជាបានឡើយ។

ក្រោយចប់ការប្រកួតលោក Koji Gyotoku បានសម្ដែងក្ដីរីករាយ និងកោតសរសើរកូនក្រុម ដែលខំប្រឹង និងធ្វើបានយ៉ាងល្អ ។ តែទន្ទឹមនឹងការឈ្នះ ២ប្រកួតជាប់គ្នា ក្នុងជំនួបមិត្តភាពអន្ដរជាតិនេះ លោកក៏មានការបារម្ភខ្លះពីភារកិច្ចបន្ទាប់ ដែលត្រូវត្រៀមប្រកួតជើងឯកអាស៊ីអាគ្នេយ៍ ឆ្នាំ២០២៦ រឿងកោះហៅកីឡាករ កំឡុងពេលក្លិបរៀបចំកីឡាករត្រៀម Pre-Season ដោយបារម្ភកោះហៅកីឡាករមិនបានសមតាមបំណងចង់បាន។

ចំណែកលោក Roberto Losada វិញ បានលើកឡើងថា លោកពិតជាមិនសប្បាយចិត្ត ជាមួយនឹងលទ្ធផល តែក៏មានចំណុចគួរសិក្សា និងរៀនសូត្រពីការប្រកួតនេះ បន្ទាប់ពីកីឡាករក្មេងៗរបស់ខ្លួន ធ្វើបានល្អ ទោះបីលទ្ធផលមិនតបនឹងការចង់បានក៏ដោយ។

សូមបញ្ជាក់ថា ជ័យជម្នះរបស់ក្រុមជម្រើសជាតិកម្ពុជា លើក្រុមហុងកុង បានធ្វើឲ្យអ្នកគាំទ្រសប្បាយរីករាយជាខ្លាំង ដ្បិតនេះគឺជាជ័យជម្នះប្រវត្តិសាស្ដ្រ ក្រោយធ្លាប់ជួបគ្នា ១១លើកកន្លងមក កម្ពុជាមិនធ្លាប់ឈ្នះហុងកុងសោះ បានត្រឹមស្មើ ៣លើក ទើបតែជំនួបលើកទី២ នេះ កម្ពុជាធ្វើបានយ៉ាងល្អ ចំពោះមុខអ្នកទស្សនាផ្ទាល់ជាង ២ម៉ឺននាក់ ដោយរកបាន ២គ្រាប់ និងរក្សា Clean Sheet ថែមទៀត៕ អត្ថបទ លី ឈុនឡា