រដ្ឋមន្ត្រីថាមពលអាមេរិក លោក Chris Wright បាននិយាយកាលពីថ្ងៃអង្គារថា ចរាចរណ៍នាវានៅឈូងសមុទ្រ និងការនាំចេញប្រេងតាមរយៈច្រកសមុទ្រហ័រមូស កំពុងកើនឡើង ទោះបីជាទីក្រុងវ៉ាស៊ីនតោន និងទីក្រុងតេអេរ៉ង់ កំពុងប្រឹងប្រែងដើម្បីឈានដល់កិច្ចព្រមព្រៀងមួយស្តីពីការបញ្ចប់សង្គ្រាមដែលមានអាយុកាលជាងបីខែរបស់ពួកគេក៏ដោយ។

លោក Wright បាននិយាយនៅពេលសួរថាតើចរាចរណ៍នាវាកំពុងឆ្លងកាត់ច្រកសមុទ្រនេះយ៉ាងដូចម្តេចបើប្រៀបធៀបទៅនឹងមួយសប្តាហ៍ ឬពីរសប្តាហ៍មុនថា៖«ខ្ញុំចង់និយាយថា មានការកើនឡើងគួរឲ្យកត់សម្គាល់»។

លោកបានលើកឡើងថា ការនាំចេញប្រេងតាមរយៈច្រកសមុទ្រនេះ និងឈូងសមុទ្រ បានកើនឡើង ហើយ «នឹងបន្តកើនឡើង»។

លោក Wright បានធ្វើការអត្ថាធិប្បាយនេះ ក្នុងអំឡុងពេលសន្និសីទក្រុមប្រឹក្សាអាត្លង់ទិក ហើយបានបន្ថែមថា វានឹងចំណាយពេលច្រើនខែដើម្បីត្រឡបទៅរកលំហូរថាមពល និងសម្ភារៈសំខាន់ៗធម្មតាវិញ ដូចជាស្ពាន់ធ័រ អេលីយ៉ូម និងប្រេងរំអិល នៅពេលដែលសន្តិភាពយូរអង្វែង ត្រូវបានសម្រេច។

ចរាចរណ៍នាវានៅច្រកសមុទ្រហ័រមូស ត្រូវបានរារាំងយ៉ាងខ្លាំង ចាប់តាំងពីការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ នៅចុងខែកុម្ភៈ ដោយរំខានដល់ការផ្គត់ផ្គង់ប្រេង និងឧស្ម័នធម្មជាតិរាវ ទូទាំងពិភពលោកប្រហែល ២០ភាគរយ៕