នៅថ្ងៃពុធ (ទី១០ ខែមិថុនា ឆ្នាំ២០២៦) នេះ ប្រព័ន្ធផ្សព្វផ្សាយរដ្ឋ បានរាយការណ៍ថា ប្រធានាធិបតីចិន លោក ស៊ី ជីនពីង (Xi Jinping) បាន​ថ្លែង​អំណរគុណ​ដល់​លោក គីម ជុងអ៊ុន (Kim Jong Un) ចំពោះការ​មាន​នូវ​បដិសណ្ឋារកិច្ចដ៏​កក់ក្ដៅ​ អំឡុងដំណើរទស្សនកិច្ចផ្លូវរដ្ឋរបស់លោកទៅកាន់ប្រទេសកូរ៉េខាងជើងថ្មីៗនេះ ដោយបានពិពណ៌នាអំពីដំណើរនេះ​ថា ជាជោគជ័យ និងជាព្រឹត្តិការណ៍សំខាន់មួយ នៅក្នុងទំនាក់ទំនងទ្វេភាគី។

លោក គីម បានទទួលសារពីលោក ស៊ី កាលពីថ្ងៃអង្គារ ដែល​បាន​បង្ហាញនូវ​ការ​ដឹង​គុណ​ ក្នុងនាមរដ្ឋាភិបាលចិន បក្សកុម្មុយនីស្តចិន និងប្រជាជនចិន។​ នេះបើយោងតាមទីភ្នាក់ងារសារព័ត៌មានមជ្ឈិម​កូរ៉េ (KCNA)។

លោក ស៊ី បានថ្លែង​ថា លោក គីម និងភរិយារបស់លោក គឺលោកស្រី រី សូលជូ (Ri Sol Ju) ក៏ដូចជារដ្ឋាភិបាល និងប្រជាជនកូរ៉េខាងជើង បានរៀបចំការស្វាគមន៍យ៉ាងកក់ក្តៅ និងរីករាយ សម្រាប់​គណៈប្រតិភូចិន ដែលឆ្លុះបញ្ចាំងពីមិត្តភាពជា​ប្រពៃណីដ៏ជ្រាលជ្រៅ រវាងរដ្ឋសង្គមនិយមជិតខាងទាំង២។

ជាមួយ​គ្នានេះ មេដឹកនាំចិន បានសង្កត់ធ្ងន់​​ថា រូប​លោក និងលោក គីម បានពិភាក្សាយ៉ាងទូលំទូលាយ ជុំវិញ​បញ្ហានានា​ដែលមានផលប្រយោជន៍ដល់​គ្នា​ទៅវិញទៅមក និងសម្រេចបាននូវកិច្ចព្រមព្រៀងសំខាន់ៗមួយចំនួន​។ លោក ស៊ី បានបន្ថែម​ថា លោកពេញចិត្តនឹងលទ្ធផលនៃដំណើរទស្សនកិច្ចនេះ ហើយបានបង្ហាញ​នូវ​ទំនុកចិត្ត ដែល​ថា ចំណងមិត្តភាព រវាងទីក្រុងប៉េកាំង និងព្យុងយ៉ាង បានឈានចូលដល់ «ដំណើរប្រវត្តិសាស្ត្រថ្មីមួយ»។

គួរបញ្ជាក់ថា លោក ស៊ី បានវិលត្រឡប់ទៅ​ទីក្រុងប៉េកាំងវិញនៅ​​ថ្ងៃអង្គារ បន្ទាប់ពីបញ្ចប់​ដំណើរទស្សនកិច្ចផ្លូវរដ្ឋដ៏កម្ររយៈពេល ២ថ្ងៃ នៅ​ទីក្រុងព្យុងយ៉ាង ជាកន្លែងដែលលោក និងលោក គីម បានប្រកាស​ថា នឹងពង្រឹងចំណងមិត្តភាពទ្វេភាគី និងជំរុញទំនាក់ទំនងឲ្យ​ទៅដល់​អ្វី​​ដែលលោក ស៊ី បានពិពណ៌នាថា ជា «យុគសម័យថ្មី»។ ហើយ​នេះក៏​ជាដំណើរទស្សនកិច្ចដំបូងផង​ដែរ​របស់លោក ស៊ី ទៅកាន់កូរ៉េខាងជើង ក្នុងរយៈពេលជិត ៧ឆ្នាំ៕