ជាច្រើនថ្ងៃបន្ទាប់ពីគ្រោះរញ្ជួយដីដ៏ខ្លាំងក្លា ដែលបានវាយប្រហារនៅភាគខាងត្បូងប្រទេសហ្វីលីពីន ប្រជាជនដែលគ្មានលំនៅឋានដោយសារគ្រោះមហន្តរាយនេះ នៅតែជួបការលំបាកដោយគ្មានស្បៀងអាហារ ទឹក ឬទីជម្រក នៅថ្ងៃពុធ ទី១០ ខែមិថុនានេះ ខណៈផ្លូវនានាដែលរងការបំផ្លាញនៅតែបន្តរារាំងដល់ក្រុមសង្គ្រោះពីការចូលទៅដល់សហគមន៍ដែលរងគ្រោះខ្លាំងបំផុត។

បំណាក់ដីបង្កឡើងដោយគ្រោះរញ្ជួយដីកម្រិត ៧,៨ រ៉ិចទ័រ បានធ្វើឱ្យលំនៅឋានបាក់រលំ និងផ្លូវថ្នល់ត្រូវបានកប់នៅទូទាំងខេត្ត Sarangani ដែលធ្វើឱ្យអ្នកនៅរស់រានជីវិតជាច្រើននាក់ត្រូវតស៊ូដោយខ្លួនឯងក្នុងគំនរបាក់បែក។ វីដេអូពីយានដ្រូន បានបង្ហាញពីគ្រឿងចក្រជីកកាយកម្ទេចកម្ទីចេញពីផ្លូវ ខណៈ ប្រជាជនបានរើសយករបស់របរនៅតាមគំនរបាក់បែកនៃលំនៅឋានដែលត្រូវបានបំផ្លាញដើម្បីសង្គ្រោះទ្រព្យសម្បត្តិរបស់ពួកគេ។

រញ្ជួយដី ដែលបានបង្កឱ្យមានការព្រមានអំពីរលកយក្សស៊ូណាមិនៅក្នុងប្រទេសជាច្រើន បានវាយប្រហារកាលពីព្រឹកថ្ងៃចន្ទ ទី៨ ខែមិថុនា។

ទីភ្នាក់ងារគ្រោះមហន្តរាយជាតិបានបង្កើនចំនួនអ្នកស្លាប់ដល់៤៦នាក់ នៅថ្ងៃពុធនេះ ខណៈចំនួនមនុស្សដែលបាត់ខ្លួនបានកើនឡើងពីបួននាក់ ដល់១៧នាក់។