វិនិយោគិនចិនមួយក្រុមដឹកនាំដោយក្រុមហ៊ុនផលិតបន្ទះឈីបអង្គចងចាំ គឺ ChangXin Memory Technologies (CXMT) បានបង្កើតមូលនិធិភាគហ៊ុនឯកជនចំនួន ៣,៩១ពាន់លានយន់ (៥៧៧លានដុល្លារ) ដើម្បីគាំទ្រដល់ការស្រាវជ្រាវ និងអភិវឌ្ឍន៍រយៈពេលវែង នៅក្នុងឧស្សាហកម្មបន្ទះ​ឈីប​។

បើ​យោងតាមរបាយការណ៍របស់សារព័ត៌មាន South China Morning Post ដែលដកស្រង់ពីវេទិកាចុះបញ្ជីសាជីវកម្ម (Tianyancha និង Qichacha) បាន​ឲ្យ​ដឹង​ថា មូលនិធិនេះ ដែលមានឈ្មោះថា Changzhi Hanhai ត្រូវបានចុះបញ្ជី នៅក្នុងតំបន់ថ្មី Pudong របស់ទីក្រុងសៀងហៃ។

ប្រព័ន្ធ​ហិរញ្ញវត្ថុ​វិនិយោគនេះ មានគោលបំណង​ផ្ដល់​នូវ​ «ដើមទុនដែល​មាន​ភាព​ធន់​​​» សម្រាប់ការស្រាវជ្រាវ និង​អភិវឌ្ឍន៍បច្ចេកវិទ្យាកម្រិត​ខ្ពស់​ នៅក្នុងវិស័យបន្ទះឈីបរបស់ចិន ដែលគម្រោងជារឿយៗតម្រូវ​ឲ្យ​មានការ​រំពឹង​ទុក​រយៈពេលវែង និងការប្តេជ្ញាចិត្តផ្តល់មូលនិធិដ៏ធំ ពោល​គឺ​ជាអ្វី​ដែល​មិនអាចបំពេញបានយ៉ាងងាយស្រួលដោយដើមទុនបណ្តាក់ទុនរយៈពេលខ្លីនោះ​ឡើយ​។

គួរបញ្ជាក់​ថា ការបង្កើតមូលនិធិនេះ កើតឡើងនៅពេលដែលប្រទេសចិនកំពុងប្រឹង​ប្រែង​កាត់បន្ថយការពឹងផ្អែកលើបច្ចេកវិទ្យាបន្ទះ​ឈីប​បរទេស ស្រប​ពេលមានការគ្រប់គ្រងការនាំចេញរបស់សហរដ្ឋអាមេរិកយ៉ាងតឹងរ៉ឹង លើបន្ទះឈីបកម្រិត​ខ្ពស់​ ឧបករណ៍ផលិតបន្ទះឈីប និងបច្ចេកវិទ្យាពាក់ព័ន្ធផ្សេង​ទៀត​។

CXMT ដែលជាក្រុមហ៊ុនផលិតបន្ទះឈីបអង្គចងចាំដ៏លេចធ្លោបំផុតមួយរបស់ប្រទេសចិន បាន និងកំពុងប្រឹង​ប្រែង​ពង្រីកតួនាទីរបស់ខ្លួន នៅក្នុងទីផ្សារបន្ទះឈីប DRAM (ឌីរ៉េម) សកល ខណៈតម្រូវការ សម្រាប់ហេដ្ឋារចនាសម្ព័ន្ធបញ្ញាសិប្បនិម្មិត (AI) ជំរុញតម្រូវការ សម្រាប់ផលិតផលអង្គចងចាំកម្រិត​ខ្ពស់​៕