នគរបាលអាហ្វ្រិកខាងត្បូងនិយាយថា មនុស្សយ៉ាងហោច ១២នាក់ ត្រូវបានសម្លាប់ និងមនុស្ស ៩នាក់ផ្សេងទៀត រងរបួស ក្នុងហេតុការណ៍បាញ់ប្រហារទ្រង់ទ្រាយធំនៅទីក្រុង Johannesburg ។

អ្នកនាំពាក្យនគរបាលនិយាយថា ក្រុមប្រដាប់អាវុធជាង ១០នាក់ ត្រូវបានដឹកតាមរថយន្ត រួចបាញ់ប្រហារតំបន់តាំងលំនៅក្រៅផ្លូវការភ្លាមៗ កាលពីវេលាម៉ោង ១១យប់ ម៉ោងក្នុងស្រុក ថ្ងៃអង្គារ ។

លោកវរសេនីយ៍ឯក Dimakatso Nevhuhulwi និយាយថា បុរស ៨នាក់ និងស្រ្តី ៣នាក់ ត្រូវបានប្រកាសថា បានស្លាប់នៅកន្លែងកើតហេតុ ។ មនុស្សម្នាក់ទៀត បានស្លាប់នៅក្នុងមន្ទីរពេទ្យ ។

ជនសង្ស័យត្រូវបានគេរាយការណ៍ថា បានចូលតំបន់តាំងលំនៅក្រៅផ្លូវការទាំង ២ច្រក រួចបាញ់ប្រហារលើអ្នកស្រុក និងមនុស្សក្នុងសហគមន៍ នៅតាមទីតាំងជាច្រើនកន្លែង មុនពេលរត់គេចខ្លួនចេញពីកន្លែងកើតហេតុ តាមរថយន្តតែមួយ ។

ដោយឡែក មូលហេតុនៃការវាយប្រហារទ្រង់ទ្រាយធំនេះ ពុំត្រូវបានដឹងភ្លាមៗនោះទេ ខណៈការស៊ើបអង្កេតកំពុងធ្វើឡើង ។

ក្រុមនគរបាលបាននិយាយថា បច្ចុប្បន្នពួកគេកំពុងតាមប្រម៉ាញ់ជនសង្ស័យជាង ១០នាក់ ក្រោយការវាយប្រហារនៅតំបន់តាំងលំនៅក្រៅផ្លូវការ Jumpers ។

សូមបញ្ជាក់ថា អាហ្វ្រិកខាងត្បូង ស្ថិតក្នុងចំណោមប្រទេសមានអត្រាឃាតកម្មខ្ពស់បំផុតនៅលើពិភពលោក ក្នុងនោះឃាតកម្មជាង ៦០ករណី ត្រូវបានរកឃើញជាមធ្យមជារៀងរាល់ថ្ងៃ ៕