ក្រុមហ៊ុនពាណិជ្ជកម្មមួយ នៅរដ្ឋ Florida កំពុងស្ថិតក្នុងការចរចាដ៏​រីក​​ចម្រើន​ ដើម្បីបញ្ជូនប្រេងឥន្ធនៈដ៏ធំបំផុតរបស់សហរដ្ឋអាមេរិកទៅកាន់ប្រទេសគុយបា ចាប់តាំងពីរដ្ឋបាលរបស់​លោក​ប្រធានាធិប​តី (Dwight D.) Eisenhower ខណៈដែលប្រទេសកោះនេះ កំពុងប្រឹង​ប្រែង​យ៉ាង​លំបាក ក្នុង​ការ​ដោះស្រាយ​ជាមួយ​វិបត្តិថាមពលធ្ងន់ធ្ងរ។

ប្រធានក្រុមហ៊ុន លោក Matthew Klann បាននិយាយថា ក្រុម​ហ៊ុន Vanguard Energy បានបញ្ជូនការដឹកជញ្ជូនប្រេងសាំង និងប្រេងម៉ាស៊ូតក្នុង​ចំនួន​តិចតួច​ទៅកាន់គុយបារួចហើយ ហើយឥឡូវនេះ កំពុងត្រៀមពង្រីកបរិមាណ។ ថ្មីៗនេះ ក្រុមហ៊ុនបានជួលធុងស្តុកប្រេង នៅក្នុងប្រទេសគុយបា ខណៈចាត់វិធានការនាំចេញប្រេងម៉ាស៊ូត និងប្រេងសាំងចំនួន ២៥០.០០០បារ៉ែល។ ហើយ​លោក Klann បាននិយាយនៅក្នុងបទសម្ភាសន៍មួយថា ប្រេងឥន្ធនៈត្រូវបានកំណត់សម្រាប់តែវិស័យឯកជន មិនមែន​ស្ថាប័ន​រដ្ឋឡើយ​។

ប្រសិនបើកើតឡើង​ពិតមែន​ វានឹងក្លាយជាទំនិញប្រេងឥន្ធនៈដ៏ធំបំផុតរបស់សហរដ្ឋអាមេរិក ដែលធ្វើដំណើរទៅ​គុយបា គិត​ចាប់តាំងពីរដ្ឋបាលរបស់លោក​ Eisenhower បានបញ្ឈប់​ពាណិជ្ជកម្មភាគច្រើនជាមួយកោះនេះ ដើម្បីសងសឹក ចំពោះការរឹបអូសធន​ធាន​ចម្រាញ់ប្រេងរបស់អាមេរិក ដោយ​របបលោក​ Fidel Castro ក្នុងឆ្នាំ១៩៦០​។

ក្រសួងរតនាគារ និងក្រសួងការបរទេសសហរដ្ឋអាមេរិកមិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ ជុំវិញ​ផែនការរបស់ក្រុម​ហ៊ុន Vanguard នេះ​។ ហើយ​ស្ថានទូតគុយបា នៅទីក្រុងវ៉ាស៊ីនតោន និងក្រសួងការបរទេសគុយបា ដែលទទួលបន្ទុកដោះស្រាយ​ការសាកសួរព័ត៌មានអន្តរជាតិ ក៏មិនឆ្លើយតបភ្លាមៗនោះ​ដែរ។

គួរ​បញ្ជាក់​ថា បន្ទាប់ពីមាន​ការចាប់ខ្លួនមេដឹកនាំនៃប្រទេសវ៉េណេស៊ុយអេឡា ដែលជាអ្នកគាំទ្រ​ដ៏​សំខាន់របស់គុយបា កាលពីខែមករា ការដឹកជញ្ជូនថាមពលរបស់អាមេរិកទៅកាន់កោះនេះ ត្រូវបាននាំ​មុខ​ដោយ​កិច្ចប្រឹងប្រែងមនុស្សធម៌ និងសហគ្រាសឯកជន៕